PLUIJM ASEMA TAIFA STARS ILITAKIWA IWATANDIKE ALGERIA BAO 5

Kocha Mkuu wa Yanga, Hans van Der Pluijm, raia wa Uholanzi, ametamka kuwa juzi Jumamosi Taifa Stars ilikuwa na uwezo wa kuifunga Algeria mabao 5-0 katika kipindi cha kwanza pekee.

Pluijm ambaye alikuwepo Uwanja wa Taifa jijini Dar, aliishuhudia Stars ikitoka sare ya mabao 2-2 dhidi ya Algeria kwenye mchezo wa kwanza wa kusaka nafasi ya kushiriki Kombe la Dunia 2018 nchini Urusi.

Mpaka kipindi cha kwanza kinamalizika, Stars ilikuwa mbele kwa bao 1-0 huku ikiongeza lingine kipindi cha pili dakika ya 54, lakini ikaruhusu kufungwa mabao mawili ya harakaharaka dakika za 71 na 74.

Pluijm amesema kama Stars ingezitumia nafasi ilizozipata kipindi cha kwanza, basi ingeenda mapumziko ikiongoza 5-0, lakini ilishindwa kuzitumia na kupata bao moja pekee.

Aliongeza kuwa, safu ya ulinzi ya Stars ilipoteza muelekeo kipindi cha pili huku akimtaja beki wake wa kushoto Haji Mwinyi kushindwa kucheza kwa umakini na kuruhusu mabao mawili ya harakaharaka.

“Katika kipindi cha kwanza, Stars ilikuwa na uwezo wa kushinda mabao 5-0, lakini walishindwa kuzitumia, waliporudi kipindi cha pili, mabeki wao walipoteza umakini na kuruhusu mashambulizi ya mara kwa mara na hatimaye Algeria ikasawazisha.

“Haji alishindwa kulinda vizuri kwenye upande wake na ukichanganya na kutokuwa na mawasiliano sahihi kwa mabeki wote, wakashindwa kulinda ushindi wao, kiukweli inaumiza.

“Lakini Stars inayo nafasi ya kufuzu hatua inayofuata kama tu ikitumia vilivyo makosa ya Algeria, kwani nimeona mabeki wao hawana spidi, hivyo washambuliaji wanapaswa kutumia upungufu huo, lakini wawe makini na washambuliaji wao kwani ni hatari sana,” alisema Pluijm.