JKT TANZANIA SIMBA KITAWAKA LEO MAZIMA, HAWA HAPA WATAKAOKOSEKANA, MAKOCHA WAMWAGA TAMBO

LEO uwanja wa Uhuru, Simba akiwa na hasira zake za kutolewa kwenye michuano ya kimataifa na UD do Songo kwa faida ya bao la ugenini anaanza hesabu zake kutetea kombe la Ligi Kuu Bara mbele ya JKT Tanzania.

Rekodi zinaonyesha kuwa msimu uliopita, JKT Tanzania ambayo ilikuwa imepanda Daraja iliacha pointi zote sita mikononi mwa Simba.

Mchezo wa kwanza uliochezwa uwanja wa Mkwakwani, Tanga, JKT Tanzania ilikubali kupoteza kwa jumla ya mabao 2-0 huku mfungaji akiwa ni Meddie Kagere na mchezo wa pili uwanja wa Uhuru ilipoteza kwa kufungwa bao 1-0.

Ripoti za daktari wa JKT Tanzania iliyo chini ya Mohamed Abdallah ‘Bares’ ambao waliweka kambi visiwani Zanzibar zinaonyesha kwamba mpaka sasa hakuna majeruhi hata mmoja na wote wapo na morali ya kufuta gundu la msimu uliopita.

Bares amesema kuwa wachezaji wana morali kubwa ya kupambana na amewapa majukumu maalumu kwenye mchezo huu muhimu na mgumu.

Kwa upande wa Simba iliyo chini ya Mbelgiji, Patrick Aussems yeye atawakosa wachezaji wake muhimu ambao ni John Bocco, Wilker Henrique ambao wanasumbuliwa na goti pamoja na Jonas Mkude ambaye anahoma. 

Aussems amesema wapo tayari na wamejipanga kuanza kufanya vema mbele ya JKT Tanzania leo.