KAGERE ATESWA NA JAMBO HILI SIMBA

Meddie Kagere mshambuliaji wa Simba, msimu uliopita aliibuka kinara wa mabao kwenye Ligi Kuu Bara baada ya kufunga 23, msimu huu ameweka wazi kuwa ana kazi ngumu ya kuhakikisha anaifikia rekodi hiyo na kuipita.

Kagere msimu huu mpaka sasa katika mechi tano alizocheza amefanikiwa kufunga mabao saba na kuongoza kwenye listi ya wafungaji. Kesho Simba itacheza na Singida United kwenye Uwanja wa Sheikh Amri Abeid uliopo Arusha.

Kagere ambaye amejiunga na Simba msimu uliopita na kufanikiwa kuiongoza timu hiyo kutwaa ubingwa wa ligi kuu na pia kufika robo fainali ya Ligi ya Mabingwa amedai kuwa anateswa na rekodi yake aliyoiweka msimu uliopita.

Alisema kwa sasa ana changamoto ya kuhakikisha anaifikia rekodi yake ya kufunga mabao 23 na kisha kuipita. “Changamoto ni nyingi lakini

ninachoweza kusema ni kwamba Kagere wa msimu uliopita anaweza kuwa tofauti na msimu huu. “Hata hivyo, jambo kubwa ambalo kwa sasa linaniumiza kichwa ni kuifikia rekodi yangu ya msimu uliopita ambapo nilifunga mabao 23, kwa hiyo ninachoweza kusema ni kwamba natakiwa kupambana vilivyo ili kuona kama ninaweza kuifikia,” alisema Kagere.