HARUNA NIYONZIMA AYALILIA MAMILIONI YA GSM NAMNA HII

HARUNA Niyonzima amesema matokeo ya sare nne mfululizo ndani ya ligi kuu, yamewanyima vitu vingi, mbali ya kuwa katika nafasi finyu ya kuwa mabingwa pia wamepishana na milioni 40 kutoka kwa GSM, ambazo wangepata kama wangeshinda michezo yote.

Niyonzima amesema wachezaji wote wanaumia kwa kupata sare, kwani wao soka ndiyo kitu kinachoendesha maisha na kuhudumia familia zao, kwa kuwa wamekuwa wakiingiza shilingi miloni 10, kila wanaposhinda mechi, hivyo kukosa ushindi katika mechi nne mfululizo kunafanya wapitie kipindi kigumu.

Ikumbukwe kuwa, kampuni ya GSM, ilitoa ahadi ya kutoa shilingi milioni 10 kwenda kwa wachezaji wa Yanga, kwenye kila mchezo ambao watakuwa wanashinda, jambo ambalo wamekuwa wakilikitimiza kila wanaposhinda mchezo.

Akizungumzu na Championi Jumatano Niyonzima alisema: “Kiukweli sisi kama wachezaji tunapitia kipindi kigumu sana kwa sasa, kwa kuwa soka ndiyo kazi yetu inayoendesha familia zetu, ukumbuke kuna milioni 10 za mdhamini ambazo huwa tunapata ikitokea tumeshinda mchezo, michezo minne imepita hatujashinda, unaweza ukaona hapo tumekosa fedha kiasi gani.

“Lakini tunaamini kuwa hiki ni kipindi cha mpito tunapitia, kwa sababu timu yetu inacheza vizuri, ila tumekuwa tukikosa matokeo tunayotaka, mashabiki wetu wasikate tamaa, tutakaa sawa na tutakuwa tunashinda kila mchezo,” alisema Niyonzima.