MAOFISA HABARI BONGO MNASTAHILI PONGEZI, UZINGUAJI MWISHO 2020

 

PONGEZI kubwa kwa maofisa habari wa timu zote zinazoshiriki Ligi Kuu Bara, Ligi Daraja la Kwanza, Ligi ya Wanawake pamoja na Ligi Daraja la Pili.

Kazi yenu nyepesi na nzuri kwa sababu mmeichagua hivyo nikisema ni ngumu nitakuwa ninawaongopea ila ni nzuri na inaonekana kwa jamii kutokana na kile ambacho mnakifanya.

Mazuri yapo kwa mwaka 2020 ambapo kila mmoja amekuwa na njia yake ya kipekee katika kuwakilisha taarifa kwa mashabiki pamoja na wale ambao wanawafuatilia.

Wakati mwingine pia kumekuwa na uzinguaji ndani ya mwaka 2020 ila hayo inapaswa yaachwe 2020 na kufungua ukurasa mpya 2021.

Haji Manara, Ofisa Habari wa Simba anastahili pongezi kwa jitihada zake za kuitangaza Simba na jitahada zake zinaonekana.

Mkongwe Thobias Kifaru wa Mtibwa Sugar ni moja ya maofisa habari ambao wanajali muda na kutoa kile ambacho kinahitajika kwa mashabiki wake pamoja na wale ambao wanaifuatilia timu yake.

Nakumbuka zama zile nikiwa nasoma masuala ya uandishi wa habari nikiwa na ndugu yangu Gwamaka Mwakanyamale ilikuwa tukiskia Kifaru anaongea lazima wote tukae kimya kisha tuanze kumsikiliza.

Alishinda mabao 4-0 dhidi ya Majimaji kumbukumbu zangu zinaniambia  akasema:”Tunasikitika kuwaambia mashabiki wetu kwamba tumeshinda kwa ushindi mwembamba wa mabao 4-0 dhidi ya Majimaji,” ,

Hakika kazi yako inapendeza, ukija kwa Masau Bwire yeye ni mzee wa kupapasa. Muda wote amekuwa akitoa ushirikiano kwa vyombo vya habari bila ubaguzi na hata akifungwa haishiwi maneno na tambo zake.

Ukimuweka kando huyo pia Thabit Zakaria ndani ya Azam FC pia amekuwa imara katika kukuza kitengo chake cha taarifa na hana tatizo na mwandishi pia kupitia ukurasa wao wa Instagram imekuwa ni rahisi kukuta kazi za vyombo mbalimbali vya habari.

Ukigusa Yanga hapa hawa wanaye Hassan Bumbuli ambaye amekuwa akiendelea kuendesha gurudumu ndani ya kikosi hicho.Anachonifurahisha ni kwamba wakati mwingine ukihitaji kumuhoji kuhusu masuala ya Yanga atakuambia hilo tutaweka kwenye mitandao ya kijamii.Kwangu mimi naona sio sawa kwa sababu anapaswa kutoa ushirikiano kwa kile ambacho anaulizwa.

Kwa JKT Tanzania wanaye Jamila Mutabazi pia kwa KMC yupo Christina Mwagala hawa ni maofisa ambao ni wapambanaji nao wanastahili pongezi.

Ligi ya Wanawake kwa JKT Queens uwepo wa Cpl Elizabeth Buliba, Baobab Queens yupo Timotheo Francis wote ni wapambanaji.

Wengi tunatambua mchango wenu na mnastahili pongezi kwa kuwa mnafanya kazi kubwa hivyo kwa yale ambayo yalifanyika 2020 kwa makosa ni wakati wa kuyaboresha ili kuwa bora kwa mwaka 2021.

Imani yangu ni kwamba kila mmoja mbali na hawa maofisa habari ambao wengine sijawaorodhesha hata wewe msomaji pia umekuwa nasi bega kwa bega ndani ya mwaka 2020 nawe pia unastahili pongezi.

Tuzidi kushirikiana pia kwa mwaka mpya wa 2021 kwa kuwa wahenga walituachia ujumbe kwamba umoja ni nguvu na utengano ni udhaifu.

 

 Ameandika: Lunyamadzo Mlyuka