HATUA KWA HATUA TIMU ZILIZOTINGA ROBO FAINALI SHIRIKISHO

SAFARI imeanza kuzidi kupamba moto ya kumsaka mshindi wa taji la Azam Sports Federation baada ya droo ya robo fainali kuchezwa na kila timu kujua nani atakutana naye.

Kwa sasa tayari mechi zimeanza kuchezwa ambapo Biashara United wao walishinda kwa mabao 2-0 dhidi ya Namungo katika mchezo uliochezwa Uwanja wa Karume, Mara.

Kwa sasa Biashara United watakuwa Uwanja wa Kambarahe wakisubiri mshindi wa mchezo wa Kombe la Shirikisho kati ya Mwadui v Yanga na atakayeshinda basi atakutana naye. 

Labda watani wa jadi wanaweza kukutana fainali ikiwa kila mmoja atapambana kwa jitihda zake na kuweza kushuhudia ile ladha ya Kariakoo Dabi nyingine baada ya ile ya awali kwenye ligi iliyopangwa kuchezwa Mei 8, 2021 kuyeyuka na inatarajiwa kuchezwa Julai 3.

 

Hapa Spoti Xtra inakuletea hatua kwa hatua namna timu hizo zilizotinga robo fainali pamoja na wapinzani wake walivyofika hapo walipo, twende sawa:-

 Simba v Dodoma Jiji

 Mabingwa watetezi Simba ni Mei 25 wanatarajia kuwakaribisha Dodoma Jiji kwenye mchezo wa robo fainali ya kwanza.

 Mshindi wa mchezo huu hatua ya nusu fainali atakutana na mshindi kati ya mchezo wa Rhino Rangers v Azam FC.

Huku kurasa zilifunguliwa

 Simba ilishinda mabao 3-0 mbele ya African Lyon, Uwanja wa Benjamini Mkapa. Simba ilikuwa ugenini haatua ya 32 bora pia Simba ilishinda mabao 2-1 dhidi ya Kagera Sugar, Uwanja wa Mkapa hatua ya 16 bora.

 

Dodoma Jiji ilishinda mbele ya Kipigwe FC jumla ya mabao 7-0 Uwanja wa Jamhuri, Dodoma hatua ya 32 bora na hatua ya 16 bora ilishinda mbele ya KMC kwa mabao 2-0, ilikuwa Mei Mosi.

 

Rhino Rangers v Azam FC

Rhino Rangers v Azam FC, Rhino Rangers timu pekee iliyotinga hatua ya robo fainali ikiwa inashiriki Ligi Daraja la Kwanza itakutana na Azam FC inayoshiriki Ligi Kuu Bara.

 Mchezo wao unatarajiwa kuchezwa Mei 26 mkoani, Uwanja wa Kambarage, Shinyanga. Mshindi wa mchezo huu atakutana na mshindi wa mchezo kati ya Simba na Dodoma Jiji.

 

Walianzia huku

 Rhino Rangers hatua ya 32 bora ilishinda mbele ya Tunduru Korosho, ilikuwa ni Februari 2, Uwanja wa St.Vincent. Dakika 90 ubao ulisoma Rhino Rangers 0-0 Tunduru Korosho na kwenye mikwaju ya penalti ngoma ilisoma Rhino Rangers 5-4 Tunduru Korosho. Ilikuwa ni Februari 26.

 Hatua ya 16 bora, Rhino Rangers ilishinda mabao 2-1 dhidi ya Arusha FC.

 

Azam FC Februari 27 ilishinda bao 1-0 mbele ya Mbuni FC inayoshiriki Ligi Daraja la Kwanza, Uwanja wa Azam Complex. Azam FC ilikuwa nyumbani hatua ya 16 bora Azam FC ilishinda mabao 2-1  dhidi ya Polisi Tanzania.

 

Biashara United v Namungo FC

 

Hizi zote zinashiriki Ligi Kuu Bara ambapo mchezo wao tayari umeshakamilika ilikuwa ni Uwanja wa Karume, Mara. Mshindi wa mchezo huu atakutana hatua ya nusu fainali kati ya mshindi wa mchezo wa Mwadui FC dhidi ya Yanga.

 Na ni Namungo ilikubali kupoteza kwa kufungwa mabao 2-0 dhidi ya Biashara United.

Mwendo wao

 Biashara United hatua ya 32 bora ilishinda mbele ya Trans Camp, Uwanja wa Karume, Februari 28. Biashara United ilikuwa nyumbani. 16 bora, Biashara United ilishinda kwa penalti 4-1 mbele ya Ruvu Shooting, Uwanja wa Karume, Aprili 4 baada ya dakika 90 ubao kusoma Biashara United 1-1 Ruvu Shoting.

Namungo FC iliibuka na ushindi mbele ya Mbeya City, Uwanja wa Majaliwa kwa bao 1-0.  Hatua ya 16 bora Namungo ilishinda mabao 3-2 dhidi ya JKT Tanzania, Uwanja wa Jamhuri, Morogoro.

 

Mwadui FC v Yanga

Timu zote mbili zinashiriki Ligi Kuu Bara ambapo Mwadui FC inakumbuka kwamba ilipokutana na Yanga zama zile ikinolewa na Khalid Adam huku Yanga ikiwa chini ya Kocha Mkuu, Cedric Kaze, ubao wa Kambarage, Shinyanga ulisoma Mwadui 0-5 Yanga.

Mshindi wa mchezo huu atakutana na mshindi wa mchez kati ya Biashara United v Namungo FC kwenye mchezo wa nusu fainali.

 

Safari zao sasa

 

Mwadui FC inayonolewa na Kocha Mkuu, Salhina Mjengwa hatua ya 32 bora ilishinda mabao 4-1 mbele ya Gwambina FC, Uwanja wa Mwadui Complex. Ilikuwa ni Februari 26.

 

16 bora, Aprili 30, Mwadui FC ilishinda mabao 2-0 dhidi ya Coastal Union, Uwanja wa Mwadui Complex.

 

Yanga ilishinda bao 1-0 dhidi ya Ken Gold, Uwanja wa Uhuru ilikuwa ni Februari 27.

 

ilitinga hatua ya robo fainali kwa ushindi wa bao 1-0 dhidi ya Tanzania Prisons, Uwanja wa Nelson Mandela, Aprili 30.

 Mchezo huu utachezwa leo, Uwanja wa Kambarage, saa 10:00 jioni.

Hat trick zipo

Anuary Jabiry wa Dodoma Jiji alisepa na mpira wake wakati timu hiyo ikishinda mabao 7-0 dhidi ya Kipigwe alifunda dakika ya 20,35 na 68.

 

Relliats Lusajo wa Namungo alitupia mabao matatu na kusepa na mpira wake ilikuwa dakika ya 23,26 na 41.