CHELSEA YAICHINJA KAZAN, SPURS YAKAMATWA, BALE AUMIA

Chelsea imeendelea na mwendo mzuri katika michuano ya Europa baada ya kuichapa Rubin Kazan kwa mabao 3-1.

Mshambuliaji wake, Fernando Torres ‘Nando’ amerudi nyavuni mara mbili baada ya kufunga bao katika dakika ya 16 na baadaye dakika ya 70.

Mnigeria Victor Moses ambaye alitoka katika kipindi cha pili, naye alikuwa kati ya waliotikiza nyavu za wageni wao kwenye Uwanja wa Stamford Bridge jijini London. 

Bao pekee la Kazan lilipatikana kwa mkwaju wa penalti kupitia Natcho baada ya nahodha John Terry kuunawa mpira.

 Katika mechi nyingine za Europa usiku wa kuamkia leo, Spurs ikiwa nyumbani ilijikuta ikilazimika kusawazisha mara mbili dhidi ya Basle ya Uswiss ili kupata sare ya mabao 2-2.

Pamoja na kufanikiwa kupata sare hiyo, Spurs ilipata pigo kubwa baada ya kiungo wake nyota, Gareth Bale alipoumia vibaya baada ya kukanywagwa na beki wa Basle.

Upande mwingine Benfica iliionyesha kazi nyumbani baada ya kuikaribisha Newcastle ya England na kuichapa kwa mabao 3-1.

Bao pekee la Waingereza hao lilifungwa na Papis Cisse huku wenyeji wakionekana kuwa hatari zaidi na wangekuwa makini wangeweza kuibuka na ushindi mkubwa zaidi ya huo.

Kwa upande mwingine, Fernabache ya Uturuki ikiongozwa na mshambuliaji wa zamani wa Liverpool, Dick Kuyt ilishinda bao 1-0 dhidi ya Lazio ya Italia. Mholanzi huyo alifunga bao moja.