MFARANSA AMUAMBIA SUNZU AANDIKE BARUA KUJIELEZA, AMTIMUA TENA MAZOEZINI

KOCHA Mkuu wa Simba, Patrick Liewig, amemtaka mshambuliaji wake Mzambia, Felix Mumba Sunzu aandike barua ya kujieleza.

Liewig raia wa Ufaransa amemtaka Sunzu ajieleze kwa nini alitoweka mazoezini bila ya taarifa.

Sunzu amekuwa akijifua kivyake takribani wiki mbili sasa baada ya kocha huyo kumfukuza mazoezini baada ya kutoweka kwa siku kadhaa bila ya kumtaarifu na baadaye ikaelezwa alikwenda kwao Zambia.

Sunzu ambaye amekuwa akikanusha kwamba alikwenda Zambia, amekuwa katika wakati mgumu dhidi ya kocha huyo.

Kumekuwa hakuna uelewano mzuri kati ya Sunzu na Liewig na Mzambia huyo tayari ameweka wazi kwamba hana raha tena ndani ya Simba.

Juzi, Liewig alimfukuza tena Sunzu katika mazoezi ya Simba katika viwanja vya Leaders jijini Dar.

Baada ya kufukuzwa, Sunzu alikwenda kwenye uwanja mwingine wa eneo hilo na kujiunga na timu ya waigiza filamu maarufu kama Bongo Movie na kufanya nao mazoezi.

Tayari mshambuliaji mwingine, Abdallah Juma ameambiwa pia aandike barua kujieleza.

Liewig aliamua kuwatosa wakali hao na badala yake kutumia wachezaji makinda ingawa mwendo wa Simba umekuwa haueleweki.