SIMBA WAMRUDISHA KAZIMOTO KUNDINI

Pamoja na msimamo wa uongozi kuwasimamisha wachezaji wakongwe katika kikosi cha Simba, lakini hali imezidi kuonekana kuwa ngumu.

Uthibitisho wa hilo umeonekana baada ya uongozi wa Simba kuamua kumrejesha kiungo wake Mwinyi Kazimoto.

Msemaji wa Simba, Ezekiel Kamwaga amethibitisha uamuzi wa uongozi kumrudisha kiungo huyo kundini.

“Tayari Kazimoto amepewa barua na ataanza mazoezi na wenzake mara moja,” alisema.

Wiki iliyopita, Kocha Mkuu wa Simba, Patrick Liewig alizuia Kazimoto asisafiri hadi Bukoba kuungana na kikosi hicho.

Kazimoto aliyekuwa amemaliza majukumu ya kuichezea Taifa Stars dhidi ya Morocco alilazimika kubaki jijini Dar.