AZAM YAUWAWA MOROCCO, BOCCO AKOSA PENALTY, MASHABIKI WAFANYA VURUGU UWANJANI

Azam FC imeng’oka katika michuano ya Kombe la Shirikisho baada ya kukubali kipigo cha mabao 2-1 dhidi ya wenyeji wake AS FAR.

John Bocco ndiye aliyefunga bao pekee la Azam FC, lakini ndiye akaiangusha baada ya kukosa mkwaju wa penalty katika dakika ya 81.

Iwapo Azam FC ingepata mkwaju huo wa penalty aliopiga Bocco, basi ingekuwa imesonga mbele kwa nafasi ya bao la ugenini kwa kuwa katika mechi ya kwanza, matokeo yalikuwa sare ya bila kufungana.

Waamuzi kutoka Algeria, aliyekuwa kati Abib Charef Medh aliyesaidiana kazi na na Mahmoud Bitam na Mohamed Mekous mwanzo alionekana kama kuibania Azam FC ‘kiana’.

Lakini baadaye alijirekebisha na kuacha kipigwe kwa uhakika na Azam FC wanapaswa kujilaumu wenyewe kwa kukubali kutolewa.

Baada ya Bocco kuifungia Azam FC, mashabiki wa Rabat walifanya vurugu lakini wakathibitiwa na askari polisi uwanjani hapo na dakika chache baadaye wakapata bao la kusawazisha kupitia Abdelrahim Achchakir aliyefunga kwa mkwaju wa penalty.

Abib Charef Medh akamlika kadi nyekundu Achchakir katika dakika ya 35 baada ya kumchezea ‘undundu’ Mganda, Brian Umony.

Azam walipata pigo baada ya David Mwantika kulimwa kadi nyekundu katika dakika ya 57 na baada ya hapo, wenyeji wakazisidha mashambulizi makali.

Beki mwingine wa Azam FC, Waziri Salum naye akamuangusha Kaddioiu Yuossef katika dakika ya 74 na kulimwa kadi nyekundu.

Azam FC walibaki wawakilishi pekee wa Tanzania katika michuano ya kimataifa iliyo chini ya Caf, maana yake Bongo inabaki mikono mitupu.

Kikosi Azam FC:

Mwadini Ally, Himid Mao, Waziri Salum, David Mwantika, Joackins Atudo, Kipre Bolou, Kipre Tchetche, Salum Abubakar, John Bocco, Humprey Mieno/Gaudence Mwaikimba na Brian Umony/Khamis Mcha ‘Vialli’.

 
AS FAR Rabat:

Ali Grouni, Anouar Younes/Ennajar Tarik, Younes Hammal, Younes Belakhdar, Kaddoui Youssef, Abdelrahim Achchakir, Aqqal Salahedine/Alloudi Soufiane, Mustafa Allaoui, El Kodry Yassine, El Bakali Medamine na El Yousfi Mostafa.