WAKONGO WANNE WAJITOKEZA KUTAKA KUFANYA KAZI NA KIBADENI

Na Saleh Ally

KOCHA Mkuu mpya wa Simba, Abdallah Kibadeni ameanza kazi rasmi baada ya kusaini mkataba wa miaka miwili na klabu hiyo.

Siku ya kwanza akiwa kazini na Simba imehusisha kuwafanyia majaribio wachezaji wanaowania kusajiliwa Simba na raia wanne wa DR Congo wamejitokeza kuwania nafasi hiyo.

Kibadeni aliyekuwa kocha wa kagera Sugar msimu uliopita, jana aliliongoza benchi lake la ufundi akiwa na msaidizi wake, Jamhuri Kihwelo ‘Julio’ pamoja na makocha wa timu za vijana na watoto wa Simba, Selemani Matola na Amri Said ‘Stam’ kufanya kazi hiyo.

Katika shughuli hiyo iliyokuwa ikifanyika asubuhi kwenye Uwanja wa Kinesi jijini Dar es Salama, Wakongo watano walikuwa ni Patric Milambo kutoka Nguena ya DRC, Fabrice Baloko (Villa-DRC), Joe Fils, Fabian Tshiyaz (Vita Club, Lubumbashi-DRC).

Pia kulikuwa na Adeyun Saleh kutoka Mlandege ya Zanzibar na wote walishiriki katika kundi la vijana zaidi ya 50 waliojitokeza kuwania nafasi ya kuichezea Simba.

“Ndiyo tunaanza kazi hii ya vijana, lakini mimi tayari nimesaini mkataba wa miaka miwili na Simba,” alisema Kibadeni.

Salehjembe: Makocha hupenda kuhama na wasaidizi wao, unawaleta wa Kagera?

Kibadeni: Hapana, mimi, Julio, Matola na wengine tunatosha sana. Watuamini tu.

Salehjembe: Unahisi hawawaamini?

Kibadeni: Inawezekana, unajua nimefanikiwa Kagera kwa kuwa nilikuwa napanga timu mwenyewe. Sipendi kupangiwa timu, mfano nisikie sijui mwenyekiti anataka mchezaji fulani acheze, sitakubali. 

Salehjembe: Unafikiri unahitaji muda gani kubadili Simba?

Kibadeni: Muda ni kawaida, lakini lazima kuwe na uvumilivu na watuamini tutengeneze timu, hatuwezi kufeli.

Salehjembe: Usajili unaofanyika unakuridhisha?

Kibadeni: Sasa siwezi kusema, wachezaji nitawaona uwanjani na kwa kuwa tuna muda, basi nitajua cha kufanya. Vizuri tutakuwa na muda wa kujirekebisha na michuano ya Kagame, Sudan pia itatusaidia kuijua timu yetu vizuri.

Salehjembe: Kila la kheri katika kazi yako mpya.

Kibadeni: Nashukuru.