KUMBE INAWEZEKANA SIMBA, YANGA KUUNGANA NA KUWA MOJA KWA AJILI YA TAIFA

Katika mechi kati ya Taifa Stars dhidi ya Ivory Coast, pamoja na kupoteza kwa kufungwa kwa mabao 4-2, uwanjani kulikuwa na ushirikiano wa hali ya juu kabisa.

Mashabiki wengi waliojitokeza waliendelea kuua utamaduni mbovu wa miaka michache iliyopita ya kila upande hasa Yanga na Simba kushangilia wachezaji wao.

Wakati Fulani ilifikia, Yanga wanashangilia wachezaji wao na kuwazomea wa Simba bila ya kujali wanachezea timu ya taifa, halikadhalika Simba walifanya hivyo pia.

Hakikuwa kitu kizuri, kilileta mgawanyiko, msawijiko na mshangao kwa wengi wenye utaifa.

Lakini sasa ni raha na mambo yamebadilika, inawezekana kabisa mambo yakabadilika na Yanga na Simba siku moja wakaungana na kuizomea timu ya ugenini.

Angalia picha hii inavyoonyesha, mashabiki wa Simba na Yanga wameunganisha bendera zao na kuishangilia Taifa Stars.

Hili ni jambo la faraja sana, linaweza kuonekana ni kitu kidogo, lakini maana yake ni kubwa sana kwa maana ya utaifa.

Labda tuendelee kusubiri, siku moja pale mashabiki wa timu hizo mbili kubwa hapa Tanzania watakapoungana na kuizomea timu ya nje na siku nyingine upande mwingine ukausaidie mwingine na mwisho uwe utamaduni.

Katika pitapita zangu, nimeshuhudia suala hilo katika nchi tatu, kwanza Misri, pili Tunisia na tatu Rwanda. Maana yake hata Tanzania inawezekana.