KUTU ZAANZA KUUTAFUNA UWANJA WA TAIFA, SERIKALI ….

Mara kadhaa kumekuwa na malalamiko kuhusiana na mambo yalivyo katika Uwanja wa Taifa jijini Dar es Salaam.

Ninamaanisha waharibifu wa mali za uwanja huo hasa wale ambao wamekuwa wakikosa ustaarabu na wanaotaka kuonekana machoni mwa watu.

Wanafanya hivyo kwa kuwa wanataka kupata umaarufu wa haraka, hata kama mwamuzi atakosea, wakiamini ‘wanaumwa’, basi mara moja wanaanza kuvunja viti.

Jiulize hasira zao na viti zinaendana vipi, kwa kifupi ni kutaka kuonekana ni kama wale watu wa Ulaya kwa kuwa wamewaona kwenye runinga waking’oa vipi, huo ni upuuzi.

Watu wa hivyo, tumekuwa tukiwapiga vita na lazima wajizuie na hasira hizo, au wachague kubaki nyumbani ili wauache salama Uwanja wa Taifa ili utumiwe na wadogo zetu na ikiwezekana baadaye watoto zetu kama ambavyo tulivyoukuta Uwanja wa Uhuru.

Pamoja na hao, uchunguzi wa Salehjembe umeonyesha kuna mambo kadhaa yanatakiwa kufanywa na serikali kuhusiana na uwanja huo.

Ukarabati wa mara kwa mara, kaka ukiangalia utaona uwanja huo unaanza kupata kasoro kadhaa zinazoashiria matengenezo.

Inawezekana serikali haijaona, lakini inaendelea kufurahia vitita vya fedha zinavyoingizwa na uwanja huo ghali zaidi Afrika Mashariki na Kati.

Mfano mzuri kama picha zinavyoonyesha, hayo ni mabenchi ya huo uwanja ambayo makocha na wachezaji wa akiba hukalia.

Yanaonekana yameanza kuoza na kutu na huenda baada ya muda yakameguka, lakini wahusika wa uwanja hawajaliona hilo.

Au inawezekana wameliona lakini wanapuuzia, siku zote kutu hutakiwa kuwahiwa mapema. Hivyo ni lazima waanze sasa na si kusubiri.

Ukarabati wa kutu ukifanyika mapema, hata gharama hupungua, ila unavyozidi kuachwa ndiyo tatizo kubwa zaidi. 

Picha hizi haziongopi, kila kitu kinaonekana na wahusika walifanyie kazi mara moja suala hilo.