MAKALA: MUSONYE, VICHWA VYA WACHEZAJI SIMBA, YANGA SI KWA AJILI YA KUTENGENEZA AMANI YA DARFUR

 

Mwaka 2009 nilikuwa kati ya Watanzania waliokuwa katika msafara wa timu ya soka ya taifa, Taifa Stars iliyokuwa inashiri michuano ya Kombe la Mataifa Afrika kwa wachezaji wanaocheza timu za ligi za nyumbani maarufu kama Chan.

Michuano ilipigwa Ivory Coast katika miji miwili ya Abidjan na Bouake na hakuna ubishi kulikuwa na hofu kubwa kuhusiana na suala la usalama ingawa inaonekana kiasi fulani mambo yalikwenda kimyakimya na hata nilipoeleza kuhusiana na hali hiyo, kuna baadhi ya viongozi kutoka TFF wakati huo walinilaumu.

Kama kawaida sikujali kwa kuwa nilichokuwa ninaandika ndicho kilikuwa kinatokea kwa kuwa Abidjan kulikuwa na amani na ndiyo yalikuwa makao makuu ya serikali ya Rais Laurent Gbagbo na mji wa Bouake kama Dar es Salaam na Singida, yalikuwa makao makuu ya wapinzani chini Allassane Watalla.

Kwa kuwa wapinzani walikuwa Bouake na serikali ya nchi hiyo ilitaka amani, basi kundi moja lilipangwa Bouake. Stars ilifanikiwa kuingia katika hatua ya mtoano na tukalazimika kusafiri hadi katika mji huo.

Hakukuwa na amani kwa kuwa tulisafiri na wanajeshi ambao walikuwa na mafunzo ya hali ya juu na silaha nzito kwenye gari. Pikipiki zaidi ya tatu, halafu tulikwenda mwendo wa kasi, chini kabisa ilikuwa ni kilomita 150 kwa saa.

Yote hii ilikuwa ni hofu ya usalama na timu haikulala Bouake, hii ni kuthibitisha hakukuwa na amani na Stars ililazimika kufanya mazoezi zaidi ya kilomita 60 na Mji Mkuu wa Yamoussoukro ambao ulionekana angalau ni salama na timu ndiyo ikawa inakaa hapo.

Hofu wakati wa safari ilikuwa kubwa sana, hakuna aliyekuwa ana asilimia mia kwamba tungefika salama bila ya kushambuliwa kila tulipokuwa safarini ambacho ni kitu kibaya sana.

Kitu cha kushukuru kwamba tulirudi salama, kwani miaka kadhaa baadaye vita iliripuka na Gbagbo akaondolewa madarakani kwa aibu kwa kukamatwa kama paka huku Watalla aliyekuwa waziri mkuu wakati huo akichukua madaraka.

Wakati huo, michuano hiyo ya Chan ilitumika kama sehemu ya kurejesha amani ya Ivory Coast, lakini bado nasema kuwa Ivory Coast wakati huo tulikuwa tukichezea “sharubu za Simba”. Ndiyo maana naona haitakuwa sahihi Simba, Yanga na Falcon kuinua mguu hapa kwenda kucheza Sudan.

Tayari Yanga na Tusker ya Kenya hadi tunakwenda mitamboni zilikuwa zimetangaza kujitoa Kombe la Kagame, huenda nyingine zikaongezeka, lakini ukweli ni kwamba vichwa vya wachezaji wa timu za Tanzania si kwa ajili ya kuweka mambo sawa Sudan.

Watu wa Sudan wanatafuta amani, kweli ni kitu kizuri lakini si sahihi amani hiyo kupatikana huku Watanziania wakiingia katika sehemu ambayo si salama. Hili lazima liangaliwe kwa umakini.

Katibu Mkuu wa Cecafa, Nicholas Musonye ameonyesha kutokuwa na hofu, sawa. Hofu yangu mimi ni kwamba Musonye anachoangalia ni fedha zinazopatikana katika michuano hiyo na si matatizo ambayo watayaopata Yanga, Simba na Falcon.

Mjadala huu ni mzuri, lakini utakuwa mzuri zaidi kama Simba na Falcon nao watafuata nyayo za Yanga kwa kuwa si vizuri kubahatisha mambo katika sehemu hatari kwa faida ya wengine.

Kweli Musonye na Cecafa wao wanafaidika, lakini hasara itakuwa kubwa kwa timu zitakazoshiriki hasa kama yatatokea matatizo. Vizuri kukaa mbali kabla ya hatari na Cecafa kama ilivyosema mashindano yataendelea tu, basi vema yaendelee.

Atakayeziona timu za Tanzania zimekuwa na uoga basi ni bora iwe hivyo kwa kuwa hatari ya Darfur ni kubwa kuliko inavyochukuliwa kwa hali ya kawaida tu, usalama ni kitu muhimu sana kwa Watanzania, bado serikali ya Sudan haina uhakika na hili asilimia mia.

Stars ilijiweka katika wakati mgumu, ilikuwa rehani kuwafaidika Ivory Coast. Safari hii hapana kwa timu zetu, michuano hiyo ikifanyika sehemu yenye usalama, zitashiriki tu.