MAKALA: ZITTO DHIDI YA KIONGOZI WA MOROCCO, WATANZANIA DHIDI YA TAIFA STARS...!!!

Na Saleh Ally

 NILIONA ujumbe kwenye ‘ukuta’ wa mtandao wa kijamii wa Facebook wa Mbunge wa Kigoma Kaskazini (Chadema), Zitto Kabwe akieleza namna analivyoshangazwa na rafiki yake mmoja ambaye alilaumu Taifa Stars kufungwa na Morocco mabao 2-1 ikiwa ugenini.

Zitto alieleza namna ambavyo alishangazwa na rafiki yake huyo na kumjibu kwamba Stars imefungwa kimchezo na Wamorocco haohao walilala kwa mabao 3-1 wakiwa hapa nyumbani, hivyo hakukuwa na geni Stars kufungwa ugenini.

Lakini Zitto alisema angeandika makala katika gazeti la Raia Mwema kuhusiana na suala hilo, nikaamua kulifuatilia na kutaka kujua. Kweli juzi nikasoma makama aliyoandika ambayo alianza na kuwafafanulia watu ambao wamekuwa wakimuuliza vipi anaonyesha kujikita katika michezo.

Naye akawa majibu kadhaa akitolea mfano historia ya soka ya Hispania ikiwa ni pamoja na sehemu kadhaa ambazo amani ilirejeshwa na mchezo wa soka baada ya mambo kubwa mamgumu, alikuwa sahihi.

Kabla sijatua katika hoja ya msingi, naongezea hapo kwamba Zitto ni mwanamichezo, inawezekana alisahau kuwaambia alikuwa kati ya wagombe wa Chama cha Soka Tanzania (Fat) mwanzoni mwa miaka ya 2000 lakini akashindwa.

Wakati huo Zitto akiwa mwanafunzi wa Chuo Kikuu Dar es Salaam (UDSM) alinivutia sana na kampeni zake, alikuwa mgombea kijana zaidi na kutokana na kuonyesha alikuwa na malengo na mipango ya baadaye, nilijitolea kuwa mmoja wa waliojaribu kuona anashinda, kwa kuwa niliamini angeweza kusaidia kupatikana kwa mabadiliko katika soka ya Tanzania, lakini akashindwa.

Nataka kusisitiza kwamba Zitto kweli ni mwanamichezo, ninaamini upande wa michezo tulimpoteza kwa kuwa hakuwa na fedha ya kuhonga na inaonyesha wapiga kura wengi wanafanya kila uchaguzi ni mtaji wao, huenda Zitto angesaidia mabadiliko kwa kiasi kikubwa katika soka yetu ambayo kweli mashabiki wanaipenda lakini yenyewe bado haijawapenda.

Kilichonigusa katika makala ya Zitto ni kuhusiana na pale alipoeleza kuwa alilazimika kupambana na kiongozi mmoja wa Shirikisho la Soka la Morocco ambaye alikuwa akilazimisha wachezaji wa Stars waingie katika chumba ambacho kilikuwa kimepuliziwa dawa ya kuwamaliza nguvu.

Zitto aliamua kupambana na kiongozi huyo kwa kuwa alijua iwapo wachezaji wa Taifa Stars wataingia katika vyumba hivyo basi kutakuwa na tatizo kubwa na madhara kwa timu yetu.

Huo ndiyo uzalendo halisi, kwani Watanzania wengi sana hawapambani kwa ajili ya Taifa Stars na badala yake wanapambana dhidi ya Taifa Stars.

Hii imekuwa ni kawaida kaida kabisa, hata kama ukienda katika mechi kwenye Uwanja wa Taifa, Dar es Salaam wakati Stars inacheza utashangazwa sana na hali ya mashabiki wengi.

Mashabiki hao wamekuwa wakitumia muda wao mwingi sana kulaumu kila kinachofanywa na wachezaji au kocha pale uwanjani. Lakini ukiangalia hata ushangiliaji wao unakuwa chini sana.

Muda mwingi wanazungumza kulaumu tu, hata matukio ya uwanjani hawayaoni vizuri na kila mmoja anataka kuonyesha yeye anajua zaidi ikiwezekana hata kuliko kocha, kitu ambacho si sahihi na wala si msaada kwa timu yetu ya taifa.

Nasema hivyo nikichukulia mfano wa Stars kupoteza mechi hiyo dhidi ya Morocco tena kwa mabao 2-1, wako ambao wamekuwa wakilalama mfululizo katika mitandao ya kijamii na wengine wakituma ujumbe wa maoni katika gazeti hili pia wakitoa lawama zao.

Wako wanaamini Stars ilistahili kushinda hivyo walichofanya ni uzembe, lakini wengine wanalaumu Kocha Kim Poulsen kumtoa Thomas Ulimwengu. Kwangu naona ni kama kichekesho kwa kuwa Poulsen ndiye aliamua kumuanzisha mchezaji huyo.

Anajua kila kinachotakiwa na utaona katika dakika alizokuwa ndani, Ulimwengu hakufanya kitu kizuri kwani naye ni binadamu na siku zinatofautiana. Hivyo kama kocha kujaribu njia nyingine ni jambo sahihi kwa kuwa kila kitu kinatakiwa haraka maana ni dakika 90 tu za mchezo.

Sidhani kama lawama ndiyo dawa ya kuisaidia Stars, bado kuna mapambano mbele mfano keshokutwa dhidi ya Ivory Coast. Lazima tukubali, uzalendo wa kuendelea kuungana hata kunapokuwa na matatizo ndiyo muhimu.

Kuiona Taifa Stars ni “bonge la timu” pale inaposhinda tu haitakuwa sawa, Morocco ni timu kubwa na maarufu lakini tuliifunga. Inawezekana pia kuifunga Ivory Coast, lakini si kwa kufanya lawama ndiyo msingi.

Kukosoa kwa maana ya kujenga ni jambo zuri, lakini kushambulia au kulaumu kila wakati si kitu bora kama njia ya kuisaidia Taifa Stars. Ni aibu kwa sisi Watanzania hasa wapenda michezo kupambana dhidi ya timu yetu tena ikiwa vitani.

Watanzania dhidi ya Taifa Stars ni sawa na Mtanzania kujishambulia mwenyewe. Kila mmoja wetu anapaswa kujiuliza mara mbili kabla na baada ya mechi ya Stars ikiwa vitani, alisaidia kitu gani au mchango wake ulikuwa ni upi na kiasi gani.

Kila la kheri wanajeshi wa Tanzania kupitia michezo katika mechi ya keshokutwa, Ivory Coast ni wagumu na wazoefu, lakini mnaweza kuwashangaza na wanafungika.