MBUYU TWITE ANA CHUMA MGUUNI, APUMZISHWA KUCHEZA YANGA, HUENDA AKAFANYIWA UPASUAJI

TWITE (KULIA) AKIWA MAZOEZINI YANGA, WIKI ILIYOPITA..

NA SALEH ALLY

Majanga kwa Yanga kwa kuwa huenda beki wao nyota, Mbuyu Twite atalazimika kupumzishwa kwa zaidi ya mwezi mmoja.

Twite raia wa Rwanda mwenyea sili ya DR Congo, huenda akapumzishwa kwa kuwa analazimika kufanyiwa upasuaji wa mguu ili kuondoa chuma kilicho mguuni mwake.

Uamuzi wa kuondoa chuma hicho umetokana na Twite kupata uvimbe nyuma ya goti lake na wataalamu wanaeleza unatokana na chuma kilicho katika mguuni mwake.

Twite amecheza na chuma hicho kwa zaidi ya miaka minne baada ya kuwekewa kutokana na kuvunjika mguu akiwa uwanjani.

Pamoja na kusuasua kuelezea kuhusiana na suala hilo, baadaye Daktari wa Yanga, Nassor Matuzya alisema wako katika mchakato wa kulishughulikia suala hilo.

“Hakika sikutaka kusema kuhusiana na suala hilo, lakini lisichukuliwe kama kubwa sana, ila kweli Twite ana tatizo na mguu wake umekuwa ukivimba nyuma ya goti kila anavyofanya mazoezi makali.

“Sasa nimemsimamisha kufanya mazoezi, kesho (leo) tutaenda kwa daktari bingwa wa magonjwa yanayohusiana na michezo naye atatushauri, nafikiri ndiyo msaada ninaohitaji lakini kwa kuangalia tu inawezekana akafanyiwa upasuaji,” alisema Matuzya na alipoulizwa ikiwa ni upasuaji atakaa nje kwa muda gani.

“Inaweza kufika mwezi mmoja au zaidi, lakini suala hilo linashughulikiwa kwa ukaribu kabisa na uongozi unafuatilia.”

Pamoja na Matuzya kutotaka kuelezea zaidi, chanzo cha ndani kutoka Yanga kimeeleza Twite atafanyiwa upasuaji ili kuondoa chuma hicho kwa lengo la kuepusha uvimbe huo kuendelea.

Chuma hicho kiliwekwa kumsaidia kurejea katika hali yake na kutokana na hali inavyokwenda, inaonekana hakuna ujanja, lazima kitolewe lakini upasuaji lazima ufanywe na daktari bingwa.

Beki huyo alijiunga na Yanga msimu uliopita akitokea APR ya Rwanda, kabla ya hapo, Simba walimtangaza kuwa atatua Msimbazi na mwenyeki, Ismail Aden Rage akapiga naye picha na kuitupia Facebook, lakini siku chache mambo yakageuka.