URA YAICHARUKIA SIMBA KUHUSU BEKI JOSEPH OWINO

OWINO WAKATI AKIWA SIMBA 

Uongozi wa URA ya Uganda umecharuka na kusema unashangazwa na kuiona inamtaka beki Joseph Owino.

Meneja wa URA, Sam Okabo amesema Simba walimuona mchezaji huyo kama takataka wakati akiwa mgonjwa.

“Tunashangazwa kuona wamekusanyika na kumpapatikia, wanataka kumsajili tena. Hadi sasa Owino ni mali yetu.

“Tungependa wafuate utaratibu lakini si kuanza kuzungumza tu na mchezaji kwanza hata kama atakuwa na mkatana mfupi na sisi,” alisema Okabo.

Simba ilimuacha Owino ikiwa ni siku chache baada ya kubadilishana na Uhuru Selemani ambaye alikwenda Azam FC.

Lakini ikaonekana alikuwa hajapona vizuri hivyo viongozi wa Simba wakaamua kuachana naye na kuanza kuhaha kusaka mabeki wengine.

Mwenyekiti wa Kamati ya Usajili ya Simba, Zacharia Hans Pope alimfuata Owino baada ya mechi ya kirafiki dhidi ya URA ambayo Msimbazi walilala.