KAPOMBE APEWA MKATABA WA MIAKA MIWILI UFARANSA

Na Saleh Ally

Beki wa Simba, Shomari Kapombe, jana alitarajia kuanza kuichezea AS Cannes ya Ufaransa ambayo imekubali kumpa mkataba wa miaka miwili.

Habari za uhakika kutoka Ufaransa ambazo zimethibitishwa na wakala wake, Dennis Kadito, zimeeleza kuwa, baada ya kujadiliana na AS Cannes, timu hiyo imekubali kumpa Kapombe mkataba huo wa miaka miwili.

“Jamaa walikuwa na mjadala, unajua kabla ilibidi wajadili kwa kuwa kulikuwa na wachezaji zaidi ya kumi ambao walikuwa wanahitaji kusajiliwa na timu hiyo.

“Timu nyingi kubwa za Ulaya zimeifanya kama soko au sehemu ya ‘shopping’, huwa zinakwenda pale na kununua wachezaji. Hivyo baada ya kujadili, kwanza wamemsainisha kiungo mmoja kutoka Senegal na Kapombe atakuwa mchezaji wa pili.

“Ninachojua kuwa Kapombe atatumiwa mkataba, unajua alishaondoka hapa Ufaransa na sasa yuko Uholanzi na wakala wake. Lakini AS Cannes watamtumia mkataba leo (jana) naye atausoma kwa msaada wa wakala wake na kuusaini,” kilieleza chanzo cha uhakika kutoka Ufaransa.

Salehjembe lilimtafuta wakala wake, Denis Kadito mmoja wa mawakala vijana wanaofanya kazi zao kwa kujituma ambaye alisema: “Kweli wale jamaa wametuma mkataba na utapitiwa kwanza kabla ya uamuzi mwingine, hivyo ninaona acha tusubiri kwanza ili nizungumze kwa uhakika.

“Unajua Kapombe amerudi hapa Uholanzi, hivyo kama leo atasaini basi ataondoka kesho kwenda Ufaransa kwa ajili ya kujiunga na timu yake hiyo mpya. Acha tusubiri halafu ndiyo nitazungumza.”

Kama hiyo jana atakuwa amesaini mkataba, Kapombe ataungana na wachezaji wengine kutoka Afrika ambao wanacheza katika timu hiyo, nao ni; Paulin Voavy (Madagascar), Elias Uzamukunda (Rwanda), Biliaminou Tidjani (Togo), Sylvain N'Diaye (Senegal) na Adama Soumare (Burundi).

Aidha, wakala huyo aliishukuru Simba kwa kuonyesha kuelewa kuhusiana na suala la Kapombe ambaye atakuwa kati ya Watanzania wachache wanaocheza Ulaya.

Kapombe alifanikiwa kufanya vizuri katika majaribio hayo na Mwenyekiti wa Kamati ya Usajili ya Simba, Zacharia Hans Pope akasema wamekubaliana kumuachia kwa mkopo katika klabu hiyo ya daraja la nne.

Pamoja na kucheza daraja la chini, klabu hiyo ina jina kubwa na iliporomoka kutokana na kuingia katika migogoro lakini kabla ilifanikiwa kuwatoa wachezaji nyota kama Zinedine Zidane, Patrick Vieira, Gael Clichy na wengine kibao.