KUANZIA YANGA, SIMBA NA WENGINE, SHILINGI NGAPI ZIMETUMIKA, NGAPI ZIMEPATIKANA, SASA IWE DIRA

PAMOJA na umaarufu mkubwa zilionao katika mchezo wa soka, klabu za Tanzania ndizo zinaongoza kwa kuendeshwa ‘kihuruma’ zaidi.

Nasema kihuruma kwa kuwa ndiyo klabu ambazo zinakwenda zaidi kwa kutegemea mapenzi ya dhati ya wanachama wao ambao wanakuwa wapo tayari kutoa au kufanya lolote ili zisiyumbe.

Wanachama wengi wa Yanga na Simba wamezigeuza klabu hizo kama furaha ya mioyo yao, huenda wana mapenzi nazo makubwa hata kuzidi familia zao!

Hivyo wanakuwa tayari kufanya lolote ili mradi wasizione zinaangamia, kuharibu mwelekeo au kupoteza heshima ambayo wao wanaona inastahili sana.

Hivyo wapo wanachama ambao wamekuwa wakitoa fedha kwa ajili ya kuhakikisha wachezaji fulani maarufu au bora wanasajiliwa na klabu hizo kwa maana ya msaada au sifa.

Lakini pia wapo wanachama ambao wamekuwa wakijitolea kuwalipa mishahara wachezaji ambao wanakuwa wamesajiliwa na timu zao ili kuhakikisha wanafanya kazi vizuri.

Kutokana na mwenendo huo, timu nyingi ukianza na Yanga na Simba, zimekuwa hazina mahesabu kamili, tena ya uhakika ili kujua kwa mwaka zimetumia kiasi gani na zimeingiza kiasi gani.

Mfano mzuri ni katika mkutano wa wanachama wa Simba uliofanyika hivi karibuni kwenye Ukumbi wa Maofisa wa Polisi Oysterbay jijini Dar es Salaam.

Utaona kila kitu kilikwenda haraka na hata katika usomaji wa matumizi na mapato, mambo yakaenda kwa kulipua na ajabu zaidi hata wanachama wenyewe waliona ni jambo la kawaida na hakuna waliokuwa tayari kutaka kujua mapato na matumizi kwa umakini zaidi.

Wanachama wengi walikuwa wanataka kwenda kuona mechi ya kirafiki kati ya Simba dhidi ya URA na wakati huo walishapewa tiketi za bure. Maana yake hakukuwa na umuhimu wa matumizi na mapato kwao, ambacho mimi naona ni kitu cha ajabu sana.

Huenda viongozi wa klabu nao wamekuwa wakifanya mambo kwa kulipua kwa kuwa hawana wanachama ambao ni makini na wanaotaka kupata uhakika wa mambo badala ya kuyaacha yaende kwa kulipua.

Viongozi wanapaswa kuwa makini na hilo na hasa wanapozungumzia suala la maendeleo ya klabu. Kweli wanataka ziendelee lakini kama hakuna mpangilio mzuri na wa uhakika kuhusiana na mapato na matumizi, bado itakuwa ni kupoteza muda.

Labda kama viongozi pia wanafanya hivyo kwa makusudi kwa kuwa lengo lao linakuwa ni kutaka kufanya mambo katika hali ya vurugu ili nao waweze kufaidisha matumbo yao.

Hata kama wanachama watakuwa wanatoa misaada, basi si kitu kizuri kupotezea matumizi ya fedha, badala yake wanapaswa kuonyeshwa kuwa, fedha zilizotolewa ni sehemu ya mapato, halafu zimetumika vipi.

Hii itazisaidia klabu hata siku zisiposaidiwa, zitakuwa zinatambua zinahitaji kiasi gani cha fedha kwa ajili ya matumizi yake. Hivyo zijipange vipi na kufanya ubunifu kwa ajili ya kuingiza fedha nyingi na za kutosha.

Klabu haziwezi kuendeshwa kisayansi uwanjani tu, wakati uendeshaji wa uongozi umezorota na mambo hayaendi kwa mpangilio wala hakuna juhudi za kitaalamu zinazofanyika kuongeza masoko na mwisho kuongeza kipato cha klabu.

Fedha ya kutosha inafanya kila kitu kwenda katika mstari. Kuanzia kwa Yanga na Simba kama klabu kubwa, zina nafasi ya kuingiza fedha nyingi kama kuna ubunifu wa utanuzi wa masoko na viongozi kweli wanakuwa na nia ya kufanya hivyo.

Lakini kujua kiasi gani kimepatikana, kiasi gani kilitumika, itakuwa ni rahisi kung’amua wapi kulikuwa na upungufu, nini kinatakiwa na kipi kifanyike kufanikisha na hiyo ndiyo itakuwa dira ya kwenda kwenye mafanikio.

Hivyo, klabu lazima zifanye kila linalowezekana kuhakikisha mambo yanakwenda namna hiyo, ninamaanisha kitaalamu.