YANGA YAISHITAKI AZAM KWA RAIS KIKWETE

Na Mwandishi Wetu

MABOSI wa Klabu ya Yanga na wale wa Kampuni ya Azam, wamekutana kwa siri katika kujadiliana juu ya sakata la Yanga kugomea mchakato wa kuonyeshwa kwa michezo yao ya Ligi Kuu Bara.

Lakini pamoja na hatua hiyo, Yanga, imeandika barua kwenda kwa Waziri wa Habari Vijana Utamaduni na Michezo, ikipinga uamuzi wa Kampuni ya Azam kutaka kuonyesha mechi zao za Ligi kuu Bara, lakini wakaomba nakala hiyo ya barua ifike kwa Rais Jakaya Mrisho Kikwete (pichani juu).

Kiongozi wa juu wa Yanga ameliambia gazeti hili jana kuwa wameshapeleka barua hiyo na wanangoja utekelezaji.

Lakini wakati huohuo, uamuzi wa kukutana kwa viongozi wa Yanga na wale wa Kampuni ya Azam inakuwa ni muendelezo wa sakata zito lililopo sasa, ambapo Yanga wamekuwa wakigomea mchakato wa kampuni hiyo kuonyesha michezo yao kutokana na Yanga kutokukubali kiasi cha Sh milioni 100 walizotakiwa kulipwa na Azam.

Taarifa ambazo Championi Ijumaa limezipata, zimedai kuwa viongozi wa juu wa Yanga walikutana na bosi mmoja wa Azam kujadiliana juu ya sakata hilo ingawa vikao hivyo havikumalizika kwa muafaka.

Mmoja wa mabosi wa Kampuni ya Azam amesema viongozi hao walikutana na bosi wa kampuni hiyo ambapo Yanga walizungumzia juu ya kutaka kulipwa zaidi ya klabu nyingine, hoja ambayo bosi huyo wa Azam alionyesha kukaribia kuikubali, ingawa alishindwa kuwapa jibu la moja kwa moja akiwataka kumpa muda.

“Hatuna tatizo na Yanga katika hili, ndiyo maana na hata bosi wetu (anamtaja kwa jina) alikubali kukutana na viongozi wa juu wa klabu hiyo, ingawa walishindwa kuafikiana katika vikao viwili tofauti walivyovifanya,” alisema mmoja wa viongozi wa Klabu ya Azam.