YANGA YATUMIA WANASHERIA WANNE KUWASILISHA RUFAA YA NGASSA

Uongozi wa Yanga umetumia wanasheria wanne kuwasilisha rufaa ya kupinga kufungiwa kwa mshambuliaji Mrisho Ngassa.

Pamoja na kupinga kufungiwa mechi sita, Yanga imepinga pia suala la Ngassa kutakiwa kulipa Simba Sh milioni 45, ikiwa ni ziada ya Sh milioni 15 katika Sh milioni 30 anazodaiwa kuchukua alipoingia mkataba huo.

Msemaji wa Yanga, Baraka Kizuguto amesema uamuzi huo umetokana na wao kushindwa kuelewa utozwaji wa adhabu hizo.

“Tayari tumewasilisha rufaa hiyo katika Kamati ya Sheria na Hadhi za Wachezaji ya TFF na wanasheria wanne kwa upande wetu wanalisimamia suala hilo,” alisema.

Kamati hiyo chini ya Alex Mngongolwa ndiyo iliyotoa adhabu hizo na Ngassa anatakiwa kukosa mechi sita za mashindano, ya kwanza ikiwa ni dhidi ya Azam FC ambayo Yanga ilishinda na kutwaa Ngao ya Jamii.

Simba ilitangaza kumuongezea Ngassa mkataba wa mwaka mmoja na ikampa gari pamoja na Sh milioni 30.