MAKALA: KUNDOKA KWANGU HAKUTATATUA TATIZO TAIFA STARS

Na Saleh Ally

Vipigo mfululizo vya timu ya taifa, Taifa Stars, vimeonyesha kuwakera mashabiki wengi ambao wanaona kuna haja ya kufanya mabadiliko katika kikosi au hata kocha.

Stars imepoteza mechi nne mfululizo za mashindano ya aina mbili tofauti, kuwania kucheza Chan na mechi za awali za kuwania kucheza Kombe la Dunia mwakani huko Brazil.

Ivory Coast ilianza kutibua raha ya Stars kwa kuifunga mabao 4-2, mechi mbili za Uganda kuwania kucheza Chan, Stars ikapoteza 1-0 nyumbani na 3-1 ugenini. Uvumilivu wa wengi ukaisha baada ya Stars kupoteza mechi ya mwisho ya kukamilisha ratiba.

Mechi hiyo dhidi ya Gambia, Stars ilifungwa mabao 2-0 ikiwa ugenini. Umuhimu wa mechi hiyo ulikuwa hivi, Stars ingeshinda ingemaliza ya pili katika kundi na kujiwekea uhakika wa kuanzia mbele itakapopangwa ratiba nyingine ya michuano hiyo ya awali. Lakini sasa italazimika kuanzia katika mechi za awali kabisa baada ya kushika nafasi ya tatu.

Watanzania ambao furaha kubwa mara ya mwisho ni pale Stars ‘ilipoitoa shoo’ Morocco kwa kuichapa mabao 3-1, wamepoteza imani na wengine wanashauri kikosi kibadilishwe au Kocha Kim Poulsen aondoke zake.

Salehjembe ilifanya mahojiano na Kim na kutaka kujua maoni hayo anayafanyia vipi kazi na mtazamo wake hasa ni upi.

Tatizo ni lipi hasa Stars inaonekana kuporomoka kwa kasi?

“Tatizo kubwa katika soka liko hivi, ukipoteza mchezo na ukajaribu kuelezea utaonekana unajitetea, lakini hali halisi ni kwamba kuna ugumu wa mambo mengi na yanapaswa kufanyiwa kazi.”

Mambo yapi, unaweza kuyafafanua?

“Utakubaliana nami, Tanzania ni nchi inayochipukia kisoka. Tuna wachezaji wachache sana wanaocheza nje na tunawahitaji kila mechi tunayocheza lakini mambo yamekuwa tofauti na ugumu unatokea kila ninapokuwa nimechagua kikosi.”

Mfano, mechi dhidi ya Gambia ulimkosa nani?

“Mechi dhidi ya Gambia nilikosa wachezaji kumi ambao ninaamini ninawahitaji kwa ajili ya kikosi cha kwanza. Juma Kaseja ni kipa niliyekuwa ninamhitaji, nilikuwa naye. Shomari Kapombe (beki wa kulia), alishindwa kuja na Shaabani Nditi wa Chelsea, kwangu ingekuwa bora kucheza namba tatu.

“Sikuwa na watu wote wa kati, Kelvin Yondani na Aggrey Morris. Kiungo wa kukaba Athumani Idd na kiungo wa juu, Sure Boy (Salum Abubakari). Washambuliaji wawili, Mwinyi Kazimoto na Thomas Ulimwengu au John Bocco. Namba 11, Mbwana Samatta lakini kiungo wa kulia ningependa kumtumia Ismail Ferouz ambaye yuko Chelsea pia.

“Inawezekana ningewachezesha wengine kama Amri Kiemba, Mrisho Ngassa na Frank Domayo lakini hao wote niliowataja wangekuwa msaada kwetu. Lakini haikuwa hivyo.”

Unafikiri unapaswa kubadili kikosi au uondoke na Tanzania ipate kocha mwingine?

“Maoni kila mtu ana yake, mimi ni mwajiriwa wa TFF. Kama itafikia hivyo, sitakuwa na kipingamizi, lakini nitashauri kwanza matatizo ya kuhakikisha wachezaji wanaotakiwa na kocha wanapatikana kuliko kuamini kocha ndiyo mwenye tatizo.

“Mnaweza kuweka kocha mwingine lakini kama matatizo ni haya anaweza asifanikiwe pia, hivyo mkaendelea kubadili makocha bila ya mafanikio na mwisho mambo yakaendelea kuwa mabaya.”

Sasa nini kifanyike kuweka mambo sawa kabla Watanzania hawajahamia kwako?

“Kuhakikisha wachezaji ninaowachagua wanapatikana, kazi yangu ni kuchagua ninaowataka na TFF inahakikisha wanafika. Timu kama TP Mazembe wamekuwa tatizo kubwa kuwaachia wachezaji bila sababu za msingi, TFF wanalijua hili.

“Wangejitahidi kubadilika na kuwa wakali hasa katika tarehe ambazo ziko chini ya Fifa maana timu ya taifa inakuwa na haki. Lakini TP Mazembe wamekuwa wakiamua na wakati mwingine kusema ni wagonjwa lakini hali halisi sivyo.”

Mechi za Chan, Samatta na Ulimwengu wasingeruhusiwa. Timu ikacheza vibaya, kiwango cha chini. Kisingizio ni nini?

“Nitakachosema ni kisingizio, si najitetea ila ninafafanua, tafadhali nieleweke. Maandalizi yalianza katika kipindi cha Mwezi Mtufuku wa Ramadhani, ninaheshimu sana imani ya wenzangu. Lakini nusu ya timu walikuwa wanafunga.

“Jiulize, vipi unampa mazoezi makali mchezaji. Lakini hata siku ya mechi ilikuwa hivyo na kweli tulicheza vibaya. Nilisikia uchungu sana kwa kuwa Uganda walikuwa chini ya uwezo wetu, sasa nifanyaje? Siwezi kuingilia imani ya mtu mwingine.”

Kuhusu kuita wachezaji wa nje, unafikiri huwezi kufanya vizuri bila ya wao?

“Wao ndiyo Tanzania, utaona wengi wao wamepata timu nje kwa kuwa walicheza vizuri kwenye kikosi cha Taifa Stars. Kapombe na Kazimoto ni mfano mzuri, kumbuka nchi yetu ni ndogo na ina watu wachache ambao wanafanya vizuri.

“Wachezaji wanaocheza nje wana mafunzo na uimara zaidi, wanaweza kuwa msaada zaidi kwa kuwa tunapokwenda kucheza na timu kama Morocco, Ivory Coast tunakutana na wachezaji wenye mafunzo ya kisasa na uzoefu mkubwa.

“Lazima kuwe na uchungu na timu ya taifa, wachezaji lazima wakubali inachangia kuwatangaza kila inapofanya vizuri. Hivyo wafike mara moja kila wanapoitwa na kulitetea taifa lao ambalo linawafaidisha.

“Leo mchezaji akitaka kusajiliwa Ulaya, basi wanaangalia katika viwango vya Fifa taifa lenu liko namba ngapi. Mkiwa katika kiwango kizuri ni sehemu ya soko zuri, hivyo lazima waithamini na kujua inawatangaza.”

Vipi kuhusu kutafuta wachezaji hapa nyumbani?

“Kuna ile timu ya vijana, tutaipa nafasi lakini bado nitafanya ziara katika mikoa kadhaa na kutafuta wachezaji.”

Ubovu wa viwanja vya mikoani hauwezi kuwa tatizo kwako kugundua vipaji sahihi?

“Swali zuri, kujua mchezaji bora, kwa kiwanja bora inakuwa sahihi zaidi. Lakini ndiyo hali halisi, kwa kocha mzoefu kama mimi naweza kuangalia mambo mengine na ubora mwingine utapatikana nitakapomchukua na akatumia kiwanja kizuri.”