BABA NGASSA AFUNGUKA, AMUONYA NGASSA KUHUSU SUALA LA KUCHOMA NYUMBA

 

KHALFANI NGASSA

Baba mzazi wa mshambuliaji wa Yanga, Mrisho Ngassa, mzee Khalfan Ngassa amefurahi kuona mwanaye huyo akifunga bao la kuokoa nyumba zake, lakini akamtumia ujumbe maalum wa karipio, juu ya ahadi yake hiyo.

 
 Khalfan amesema hakuweza kuushuhudia mchezo huo wa Simba na Yanga kutokana na kuwa na kazi ya kumalizia msiba wa mama yake mzazi, lakini hataki kusikia tena ahadi kama hizo zenye hatari, ambazo wakati mwingine ni vigumu kutekelezeka.

Mzee Khalfan ambaye ni kiungo wa zamani wa Pamba na Simba, amesema awali alivyosikia ahadi hiyo ya Ngassa kupitia gazeti hili, alishtuka vibaya, ambapo alilazimika kumtafuta Ngassa lakini hakuweza kumpata na kumtaka kuhakikisha anakuwa makini katika kuangalia mambo ya kuahidi.

“Nilishtuka sana baada ya kuona taarifa zile, lakini sikuwa mimi peke yangu, hata dada zake walishtushwa na taarifa ile, nikawaambia wawe na subira nimtafute kwanza Ngassa, ili nimuulize lakini sikumpata,” alisema mzazi huyo na kuongeza:

“Nashukuru ameweza kuondoa sintofahamu hiyo kwa kufunga, ni jambo zuri lakini sitaki kusikia tena juu ya ahadi kama hizo, ni hatari sana, inawezekana alidhani amezungumza jambo dogo lakini kwa mechi ya Simba na Yanga, ile ni hatari kubwa.”

Kauli hiyo inakuja kufuatia siku chache kabla ya mechi ya Simba na Yanga, mshambuliaji huyo kuahidi endapo atashindwa kufunga au kutoa pasi ya bao, angeweza kuchoma moto nyumba zake tano, ingawa alifanikiwa kufunga bao la kwanza kwenye mechi hiyo iliyomalizika kwa sare ya mabao 3-3.

SOURCE: CHAMPIONI