MWALALA AWATAKA YANGA KUFUATA INAVYOFANYA SIMBA

Mshambuliaji wa  zamani wa Yanga raia wa Kenya, Ben Mwalala, amesema kuwa ili Yanga iweze kuwa na wachezaji wazuri baadaye, inabidi ielekeze macho yake kuwanoa vijana wenye umri wa chini ya miaka ishirini (U-20) kuliko kununua wachezaji wa kigeni kwa gharama kubwa.

Mwalala amesema kuwa kwa muda mrefu timu hiyo imekuwa na kawaida ya kununua wachezaji wa kigeni kwa gharama kubwa wakati wengine viwango vyao ni vidogo.

“Ili Yanga baadaye iweze kuwa na hazina ya wachezaji wazuri kama timu ya Simba, inabidi iwekeze kwa vijana wa chini ya umri wa miaka ishirini,” alisema.

Aidha, kwa upande mwingine aliwashauri viongozi wa timu za hapa nchini kuacha kuingiza siasa katika masuala ya soka.

“Unakuta kiongozi wa ngazi ya juu ya klabu anaingilia kazi za kocha na kuingiza mambo ya siasa katika timu, hali ambayo husababisha migogoro na kushusha kiwango cha soka cha timu,” alisema.