MTIBWA SUGAR, AZAM FC ZAWEKA REKODI YA VIONGOZI BODI YA LIGI

 

YAHYA..

Mwenyekiti wa Mtibwa Sugar, Hamad Yahya ameweka historia kwa kuwa Mwenyekiti wa kwanza wa Bodi ya Ligi Tanzania (Tanzania Professional League- TPL Board).

Katika uchaguzi uliofayika leo, Yahya ameshinda kwa ulaini kwa kuwa alikuwa mgombea pekee katika uchaguzi huo uliofanyika kwenye ukumbi wa mikutano katika jengo la Golden Jubilee Tower katikati ya jiji la  Dar es Salaam.

Yahya alipata kura zote kumi za ndiyo, huku klabu tatu za jeshi zaJKT Ruvu, Mgambo Shooting na na Rhino Rangers pamoja na Coastal Union, zikishindwa kuhudhuria.

Mwenyekiti wa Azam FC, Said Muhammad Said Abeid pia ameweka rekodi ya kuchukua cheo hicho kwa kuchaguliwa kwa mara ya kwanza. Pia hakuwa na mpinzani.

Wajumbe wawili wa Kamati ya Uendeshaji,Khatibu Mwindadi wa Mwadui na Kazimoto Miraji Muzo wa Pamba, wameibuka washindi katika kura za klabu za Ligi Daraja la Kwanza (FDL).

Muzo alipata kura 15 za ndiyo wakati mbili zikimkataa, huku Mwindadi akipata kura 16 na moja ilimkataa. Klabu za FDL ambazo hazikuhudhuria uchaguzi huo ni Transit Camp, Burkina Faso, Polisi Mara, Stand United, Toto Africans, Polisi Tabora na Kanembwa JKT.