METODO: YANGA ISIMUACHE BRANDTS ATESEKE DAR, IMLIPE AENDE ZAKE KWA AMANI

Kumekuwa na tabia ya makocha wengi kuwa rafiki wa kila mmoja, kuanzia wachezaji, viongozi na hata waandishi wa habari kila wanapokuwa katika kazi zao.

 

Nasema kazi zao nikimaanisha wakati akiwa ndiye kocha, tena anajulikana au kukubalika na watu wote mfano wa watu hao niliowataja.

Lakini ikitokea kocha huyo akaondolewa au kufutwa kazi, basi anapoteza watu wengi sana kwa muda mfupi na wanakuwa hawamjali kabisa!

Soka ni mchezo wa watu wengi wenye tabia ya kuwajali watu pale wanapoamini wanaweza kuwapa furaha tu lakini inapokuwa vingine, basi hawajali kwa lolote lile.

Mifano iko mingi, tumeona wachezaji wanapoumia, viongozi wa timu nyingi wamekuwa wakiwakimbia na kuonyesha kutowajali bila ya hofu hata kidogo. Ilimradi wanajua hawawezi kutimiza raha yao ya kuwaona wanacheza katika kipindi hicho.

Hiyo haitoshi, tumeona inapotokea wachezaji au makocha wanapokuwa wamelazwa, ni watu wachache sana wamekuwa wakionyesha upendo na ubinadamu kwao. Wengi wamekaa kando na kuamini hawahusiki hata kidogo.

Maana yake watu wanaopenda mpira au wale wanaojiita watu wa mpira, wanawapenda wale wanaowapa raha yao ya kuisaidia timu wanayoipenda ishinde tu, wakiugua au kufukuzwa basi urafiki unakufa.

Huu unaweza kuwa ni mfano, lakini mifano niliyoeleza inaweza kuwa msingi wa kumkumusha na kumsuta kila anayeona anahusika na anaweza kubadilika, ikishindikana, basi sawa, kila mtu ana haki ya kuchagua.

Tuachane na mifano, tukumbushane kuhusiana na makocha. Yanga imetangaza kumuacha Ernie Brandts, lakini taarifa zilizopo amekuwa akihaha huku na kule na imeelezwa anabembeleza ikiwezekana alipwe fedha zake ili aondoke.

Yanga imekubali kumlipa lakini baada ya siku 30, kweli inafuata mkataba lakini kama itamlipa halafu aondoke, maana yake itakuwa imepunguza bugudha, pia itampa nafasi ya kuondoka na heshima yake.

Mambo ya kuonekana anaranda kwenye mitaa ya jiji, mara akitakiwa kwenda mazoezini, au achague mwenyewe nafikiri si sahihi.

Kuna taarifa pia amekuwa akiranda kwenye ofisi za Yanga akitaka mkataba wake alionao usainiwe ili aweze kuwadai Yanga vizuri na kila akienda hapati ushirikiano na anaondoka zake, pia si sahihi.

Tuliona wakati huo makocha wa Simba kama Milovan Cirkovic kutoka Serbia na Patrick Liewig raia we Ufaransa walivyosumbuka wakiendelea kubaki Dar es Salaam kudai fedha zao.

Yanga inaweza kujitofautisha katika hilo na kufanya mambo yaende tofauti kwa kuwa ni vizuri sana kukumbuka kwamba Brandts anastahili heshima kwa aliyoyafanya Yanga.

Hata siku moja hakuwahi kulaumiwa kwa uzembe, badala yake kila kukicha aliifanya kazi yake kwa juhudi na aliweza kuipa timu hiyo kombe.

Kama tatizo ni kuifunga Simba, pia aliwahi kufanya hivyo na atabaki kuwa mmoja wa makocha walioifundisha Yanga kwa mafanikio na kujenga kikosi bora kilichokuwa kinapiga soka safi, hilo halikwepeki.

Hivyo ni vizuri sana kuonyesha pamoja na kuonekana kwamba ameshindwa kwa sasa, basi heshima na thamani yake isishuke kutokana na kufungwa mechi moja tu.

Kama uongozi we Yanga umeona ni sahihi kuachana naye, vizuri ukamalizana naye mapema, pia ukatofautisha uvunjani wa mikataba wa makocha na watu wa ofisini. Hivyo umlindie heshima ili aondoke salama.

Heshima mara nyingi inasimama kwenye thamani au kukumbuka mazuri ya kitu au mtu. Yanga bado wanapaswa kukumbuka kazi kubwa ya kocha huyo, basi wamalizane naye vizuri, mapema na aende zake salama salimini.

Fin.