KOCHA MCAMEROON WA AZAM ATAKA GAME MBILI

Kocha Mkuu wa Azam FC, Joseph Omog, amesema anahitaji mechi mbili za kirafiki kujipima kabla ya kuanza mzunguko wa pili wa Ligi Kuu Bara ili kukiimarisha kikosi chake.

 

Azam iliondolewa katika michuano ya Kombe la Mapinduzi kwa kuvuliwa ubingwa waliokuwa nao ambapo wameanza mazoezi jana Jumanne, tayari kwa mzunguko wa pili wa ligi kuu unaoanza kutimua vumbi Januari 25.

Katibu Mkuu wa Azam FC, Idrissa Nassor, alisema wapo katika mchakato wa kusaka timu mbili ili  kucheza michezo ya kirafiki kabla ya kuanza ligi kutokana na mahitaji ya kocha Omog.

“Kocha anahitaji mechi mbili za kirafiki tuweze kumtafutia kabla ya kuanza mzunguko wa pili wa ligi na kwa sasa tupo katika mchakato huo ili kupata timu zenye ubora wa kuweza kujipima nazo.

“Timu tunazosaka ni za hapahapa nchini na siyo nje ya nchi, mechi hizo zitamsaidia kocha kuweza kukiandaa kikosi chake kabla mzunguko wa pili haujaanza.

“Kuhusu kupokonywa ubingwa, hilo halina shida kwetu kwani tumekuwa tukilimiliki kombe kwa miaka miwili mfululizo, hivyo kuna klabu nyingine zilikuwa zikihitaji na sisi tutajipanga kwa mambo mengine na tunasubiria mwakani,” alisema Nassor.

SOURCE: CHAMPIONI