KURA YA TANZANIA ILIKWENDA KWA RIBERRY, AKASHINDA RONALDO

Kocha Mkuu wa Taifa Stars, Kim Poulsen, amesema alimpigia kura ya Mchezaji Bora wa Dunia, kiungo wa Bayern Munich, Franck Ribery.

Cristiano Ronaldo alitwaa Tuzo ya Mwanasoka Bora wa Dunia wa mwaka jana juzi usiku zilipotangazwa kwenye makao makuu ya Shirikisho la Soka la Kimataifa (Fifa), Zurich, Uswis.

 Kim amisema kura yake ilikwenda kwa mchezaji huyo kutokana na kuamini ni bora kwa sababu kiwango chake si cha kubeza lakini kura nyingi ziliweza kuangukia kwa Ronaldo.

Kim alisema kuwa Messi na Ronaldo si wachezaji wa kuwabeza kutokana na viwango vyao na wamekuwa wakizisaidia sana timu zao lakini kwake Ribery alikuwa zaidi.

 “Niliweza kumpatia kura yangu Franck Ribery   kwa sababu niliamini angeweza kupata nafasi ya kuwa mwanasoka bora kutokana na uwezo  wake na kipaji chake alichokionyesha katika timu alizopitia na alipo sasa.

“Lakini si kwamba Ronaldo hakustahili, hapana, lakini kwa upande wangu Ribery alikuwa zaidi,” alisema Kim.

Ribery ameshika nafasi ya tatu baada ya Lionel Messi wa Barcelona kushika ya pili nyuma ya Cristiano Ronaldo.