ALIYEKUWA KOCHA YANGA AIONYA KUHUSIANA NA UBINGWA

Aliyekuwa Kocha Msaidizi wa Yanga, Fred Felix Minziro, amesema ikiwa timu yake hiyo isipokuwa makini katika michezo ya mzunguko wa pili wa Ligi Kuu Bara, inaweza kupoteza ubingwa.

Minziro alitupiwa virago na Yanga hivi karibuni kufuatia madai ya kutofanya vizuri kwa benchi lote la ufundi. Yanga imeshaporomoka mpaka nafasi ya pili (kabla ya jana) kutokana na kutoka suluhu na Coastal Union.

Minziro amesema matokeo ya Yanga si mabaya sana, wala si mazuri sana, lakini wachezaji wanahitaji kubadilika kwa kukaza buti ili waweze kufanikiwa kutetea ubingwa wao.

“Wachezaji wanahitaji kucheza kitimu zaidi kwa kuhakikisha wanajituma, ligi ni ngumu kutokana na kila timu kujipanga kuhakikisha inashinda katika michezo yake,” alisema Minziro.