MECHI YA MGAMBO YAPASUA KICHWA YA LOGARUSIC

Mechi ya kesho dhidi ya Mgambo JKT inaumiza kichwa cha Kocha Zdravko Logarusic.

Simba inashuka dimbani kesho kwenye Uwanja wa Mkwakwani mjini Tanga kuwavaa Mgambo Shooting wanaowasubiri kwa hamu.

Kocha huyo raia wa Croatia anasema sare dhidi ya Mtibwa imefanya aamini mechi za mikoani zitakuwa ngumu.

“Mazingira ni tofauti sana na Dar es Salaam, viwanja na kila kitu. Lakini ni lazima kufanya kila linalowezekana ili kushinda.

“Nimeambiwa mzunguko wa kwanza tuliifunga timu hii mabao sita, lakini sasa imebadilika, utaona ilivyoanza mzunguko wa pili.

“Maana yake ni mechi ya kisasi safari hii wao wakiwa nyumbani. Hatuna ujanja, kwetu pointi tatu ni muhimu na tunafanya kazi kwa nguvu sana,” alisema Logarusic.

Chini yake, Simba ilianza mzunguko wa pili na ushindi mara mbili mfululizo, lakini ilipotoka nje ya Dar es Salaam, mechi ya kwanza ilikuwa sare ya 1-1 dhidi ya Mtibwa Sugar mjini Morogoro.