MUUZA MAKOPO NDIYE ALIUGUNDUA MWILI WA MAREHEMU CHANGA

 

CHANGA (ALIYESIMAMA NYUMA)

Marehemu Omari Changa aliyefariki dunia Jumapili iliyopita ambapo gazeti hili lilikuwa la kwanza kuripoti, imeelezwa kuwa mwili wake uligundulika tangu asubuhi ya siku hiyo na muokota chupa za plastiki (makopo), lakini taarifa ilichelewa kuwafikia kwa kuwaogopa polisi.

Imeelezwa kuwa, Changa, straika wa zamani wa Yanga, alionekana Jumapili asubuhi, kabla ya taarifa za kuonekana kwa mwili wake kuanza kusambaa majira ya saa 7 mchana na taarifa kuwafikia wazazi wake saa 9 alasiri.

Inadaiwa kuwa, muuza makopo huyo hakuwa mwepesi wa kuondoka eneo hilo ambalo lilikuwa karibu kabisa na nyumba ya baba yake mzazi Changa, Mzee Changa Idd akisubiri watu wengine wanaomfahamu wapite na kumgundua Changa ili iwe rahisi ujumbe kuifikia familia ya mzee Idd.

Lakini baadaye mzee Idd alitambua mazingira yote juu ya mwili wa mtoto wake, tangu asubuhi muuza makopo alipomuona kwa mara ya kwanza.

“Taarifa zilichelewa kunifikia, lakini watu waliugundua mwili wake (Changa), mapema tangu asubuhi ila walisita kuja kututaarifu kwa kuhofia kuwa mashahidi namba moja endapo uchunguzi ungefanyika.

“Ila hakuna uchunguzi unaoendelea mpaka sasa kwa sababu tumeshamzika mtoto wetu, ila labda kama ni ripoti ya hospitali anayo baba yake mdogo Omari,” alisema Idd.

Alipozungumza na SALEHJEMBE, baba huyo mdogo wa Changa, Abou Mirambo, alisema kuwa ripoti iliyotolewa na hospitali juu ya mwili wa marehemu, inasema alipigwa na kitu kizito usoni kilichopelekea upande wa kushoto wa uso kubonyea na upande wa kulia wa paji la uso kuvimba.

Aidha, kwenye mkono wa kushoto, aligundulika kuchubuka ngozi yake yote ya juu kuanzia kwenye kiwiko mpaka kiganjani.

“Mimi pekee ndiye niliyefuatilia hizo ripoti za hospitali na ndiye niliyekabidhiwa mwili na madaktari na watu wa usalama, imebainika amepigwa na kitu kizito usoni na mchubuko wa ngozi yote ya juu kwenye mkono wake wa kushoto,” alisema Mirambo.