TEGETE WA YANGA ATANGAZA KUOKOKA

Na Lucy Mgina wa CHAMPIONI

MSHAMBULIAJI wa Yanga, Jerry Tegete, ameamua kuokoka rasmi na kumrudia Mungu.

Jerry aliandika maneno hayo kwenye ukurasa wake wa Mtandao wa Kijamii wa Facebook, kuwa ameamua kuokoka rasmi na kuachana na mambo ya kidunia kutokana na kushuhudia mama yake mzazi ambaye anaumwa, akipata nafuu baada ya kuombewa na mchungaji.

Katika ukurasa wake huo, Tegete aliandika: “Nipo Mwanza, nimekuja kumuona mama yangu anaumwa sana, lakini kaja mchungaji kumuombea na mama kapata nafuu kabisa.

“Mungu ni mkubwa sana na maisha ukimkabidhi Mungu kila kitu kinawezekana, maisha ya kidunia hayana maana bila Yesu, nimeokoka rasmi.”

Baada ya kutuma ujumbe huo, alipata wachangiaji zaidi ya 200 walioonekana kumuunga mkono na kumpongeza, huku wakimpa pole kwa kumuuguza mama yake, alipopigiwa simu ilikuwa ikiita tu bila kupokelewa kwa kuwa tayari alikuwa amesharejea Dar.

Alipopigiwa baba mzazi wa Jerry, mzee John Tegete, alisema: “Ni kweli Jerry alikuwa hapa, lakini kaondoka jana (juzi), alikuja kumuona mama yake ambaye amefanyiwa upasuaji wa goita na sasa anaendelea vizuri. Hajaniambia habari za kuokoka, lakini kama ni hivyo nampongeza.”