SHABIKI ATUKANA AFUNGIWA KUINGIA UWANJANI ZANZIBAR

Na Mwandishi Wetu, Zanzibar

Chama cha Soka Zanzibar (ZFA) kisiwani Pemba, kimemfungia kwa muda wa mwaka mmoja shabiki maarufu kisiwani hapa, Simai Abdallah Simai ‘Sakala’, kuingia Uwanja wa Gombani kuangalia mechi.

Sakala amekumbwa na rungu hilo kali kutoka kwa chama hicho kutokana na kudaiwa kuzidisha lugha kali muda wote anapokuwa uwanjani.

Barua ya chama hicho ina kumbukumbu namba REF.NO.ZFA/T/BAF/VO.V/P/123, ya Februari 2, 2014 kwenda kwa Simai Abdalla Simai, 151 KJ Vitongoji.

Barua hiyo imesema Sakala amekuwa akisababisha usumbufu mkubwa uwanjani hapo, wakati wa michezo na kuondoa nidhamu ya michezo kisiwani, jambo ambalo halikubaliki.

Aidha, barua hiyo imesema kuwa, adhabu hiyo inaanza tarehe ya kutolewa mpaka kumalizika kwa msimu huu wa ligi.