BAHANUZI AWAOMBA RADHI MASHABIKI WA YANGA

BAHANUZI AKIPAMBANA NA GEDO WA AL AHLY. MECHI HIYO ILIISHA KWA YANGA KUFUNGWA BAO 1-0, HIVYO KULAZIMISHA KUPIGWA KWA MIKWAJU YA PENALTI NA WACHEZAJI WATATU WA YANGA, BAHANUZI, OSCAR JOSHUA NA MBUYU TWITE NDIYO WALIOKOSA.

Mshambuliaji wa Yanga, Said Bahanuzi, juzi Jumamosi aliwaomba radhi mashabiki wa soka waliofurika kwenye Uwanja wa Jamhuri mjini hapa kwa kitendo cha kukosa penalti katika mchezo wa Ligi ya Mabingwa Afrika dhidi ya Al Ahly nchini Misri, wiki iliyopita.

Bahanuzi ambaye alikuwa hajawahi kukutana na mashabiki kwenye umati mkubwa tangu warudi nchini Misri, alitumia nafasi hiyo baada ya kufanya mazoezi mepesi kabla ya mechi ya Ligi Kuu Bara kati ya Mtibwa na Yanga kuanza.

Wakati wachezaji hao wakiingia vyumbani kujiandaa na mechi hiyo, aliwaacha wenzake na kwenda kusimama mbele ya jukwaa la mashabiki wa Yanga na kuwanyooshea mikono kama ishara ya kuwasalimia, kisha akajishika kifuani na kuwainamia, ishara ambayo hutumiwa na waungwana kuomba msamaha.

Baada ya kitendo hicho, mashabiki hao walimpigia makofi ndipo akaenda kujichanganya na wenzake kuelekea vyumbani. Wakati tukio hilo likiendelea, kundi la mashabiki wanaodhaniwa kuwa ni wa Simba, lilikuwa likipiga mayowe ya kumzomea.

Championi Jumatatu lilijaribu kuongea na mchezaji huyo kutaka kujua sababu za kitendo hicho, lakini alikataa kuzungumza chochote akidai hawaruhusiwi kuzungumza na wanahabari.