KIONGOZI YANGA AWEKA REKODI, ARUDISHA KLABUNI SH MILIONI 38

SANGA (KULIA) AKIWA NA MUSSA KATABARO (MWENYE KOTI JEUSI) NA WANACHAMA WENGINE WA YANGA JIJINI ALEXANDRIA, DAKIKA CHACHE KABLA YA KWENDA UWANJANI KUIVAA AL AHLY. HAO WANAJESHI NDIYO WALIOWASINDIKIZA YANGA KWENDA NA KURUDI UWANJANI.

Na Mwandishi Wetu

Makamu Mwenyekiti wa Yanga, Clement Sanga, ameweka rekodi kwenye klabu hiyo baada ya kurudisha kitita cha Sh milioni 38 mara tu baada ya kutua akitokea Misri.

Inaelezwa Sanga alikabidhiwa kitita cha dola 50,000 (Sh milioni 80) kwa ajili ya matumizi kama hoteli, posho na mengine wakati Yanga ikiwa nchini Misri kupambana na mabingwa wa Afrika, Al Ahly ambako ilitolewa kwa mikwaju ya penalti.

Baada ya timu hiyo kurejea nchini ikiwa imetolewa kwa mikwaju 4-3 ya penalti, Sanga alikwenda klabuni na kukabidhi fedha hizo ambazo zilichukuliwa haraka na kupelekwa benki, kitu ambacho kiliwashangaza watu wengi ofisini hapo.

“Kweli hiyo si hali ya kawaida, unajua fedha zile dola elfu hamsini zilitolewa kwa ajili ya bajeti ya timu ikiwa Cairo, si unajua namna Al Ahly walivyokuwa wanaiwinda Yanga kuihujumu! Hivyo kilichofanyika ni kuhakikisha kila kitu kinakuwa safi.

“Utaona namna mambo yalivyokwenda vizuri, unaweza kusema uongozi ulifanya kila linalowezekana lakini mwisho walioshindwa ni wachezaji. Si kwamba tunalaumu lakini ndiyo mambo ya mpira, lakini Sanga amefanya kazi vizuri na karudisha zile fedha, katushangaza,” kilieleza chanzo kutoka ndani ya Yanga.

Sanga ndiye alikuwa kiongozi wa mapambano wakati Yanga ikiwa nchini Misri katika miji miwili tofauti, wa Cairo ambao unaongoza kwa ukubwa nchini humo na ule unaofuatia kwa ukubwa wa Alexandria ambako ndiyo mechi ilipigwa.

Yanga ikiwa huko ilikataa hoteli na mabasi yote iliyopangiwa na Al Ahly na ikakodi kivyake. Lengo lilikuwa ni kujiepusha na hujuma za Waarabu wa Misri ambao wana mbinu nyingi sana nje ya uwanja.