SOMA HII UONE RAGE ALIVYONUSURIKA KUDUNGWA KUTOKANA NA MANENO YAKE YA SHOMBO

MMOJA WA WANACHAMA AKIWA AMECHARUKA NA KUPOROMOSHA MANENO KWA RAGE, HII ILIKUWA NI BAADA YA KUZUIWA NA ASKARI.

Mwenyekiti wa Simba, Ismail Aden Rage, jana Jumapili alinusurika kuchezea kichapo kutoka kwa wanachama wa klabu hiyo katika Mkutano Mkuu wa Katiba uliofanyika kwenye Ukumbi wa Maofisa wa Polisi wa Oysterbay jijini Dar es Salaam.

Rage alikumbana na balaa hilo baada ya kuwaita wanachama zaidi ya 1,000 waliohudhuria mkutano huo kuwa ni mbumbumbu na wenye njaa wakati alipokuwa akihutubia.

ASKARI WAKIENDELEA KUWATULIZA WANACHAMA WA SIMBA WALIOKUWA WANATAKA WAMSHIKISHE ADABU RAGE.

Maneno hayo ya Rage yaliwaudhi wanachama hao na baadhi yao wakavamia meza kuu alipokuwa ameketi na viongozi wengine wa wajumbe wa Kamati ya Utendaji ya klabu hiyo kwa lengo la kutaka kumshushia kichapo.

RAGE AKIPOROMOSHA 'MIJINENO' KWA WANACHAMA WAKE

Lakini askari polisi 15 waliokuwa wakiangalia hali ya usalama ukumbini hapo walifika mara moja na kuzuia tafrani hiyo.

Hata hivyo wanachama hao walimtaka mwenyekiti wao huyo awaombe radhi ili mkutano huo uweze kuendelea lakini aligoma jambo ambalo lilizidi kuwafanya wajawe na jazba dhidi yake.

Hata hivyo, baada ya kushauriwa na baadhi ya wanachama wa klabu hiyo, Rage aliwaomba radhi, wakamsamehe kisha mkutano huo ukaendelea.

Alifanya hivyo tena mara baada ya kumalizika kwa mkutano huo ambapo aliwaita wandishi wa habari na kusema: “Nawaomba wanachama wa Simba wanisamehe kwa lugha yangu ambayo haikuwa nzuri na sikuwa na lengo la kuwadhalilisha, naomba wanisamehe.”

Katika mkutano huo, Rage ametangaza kutogombea tena nafasi yake hiyo katika uchaguzi ujao Mei 14, mwaka huu.

Lakini akatupa dongo jingine akidai aliikuta klabu hiyo ikiwa inanuka kinyesi, chafu na akaahidi kuiacha katika hali nzuri, tofauti na alivyoikuta.