BOBAN AJIPANGA KUONDOKA COASTAL

Kiungo wa Coastal Union, Haruna Moshi ‘Boban’, huenda  asiongeze mkataba katika kikosi chake hicho.

Boban alitua Coastal Union msimu huu mwanzoni baada ya kumaliza mkataba wake na Simba msimu uliopita na kufanikiwa kupewa mkataba wa mwaka mmoja ambao unakaribia kumalizika.

Chanzo cha karibu cha mchezaji huyo, kilisema kuwa kiungo huyo kwa sasa hana mpango wa kuongeza mkataba ili kuendelea kuitumikia timu hiyo kutokana na baadhi ya mambo ambayo yanaendelea katika timu hiyo, japo hajataka kuyaweka wazi.

Aidha, chanzo hicho kilisema kuwa, dalili zinaonyesha wazi kabisa kwamba hatarudi tena kwenye kikosi hicho baada ya mkataba kumalizika.

 “Ni kweli yule Boban ni rafiki yangu lakini ni wazi kwamba hana mpango wa kuongeza mkataba tena ili kuendelea kuwa katika timu hii msimu ujao, lakini hataki kuweka wazi sababu zipi zinamfanya ashindwe kuongeza mkataba hapo klabuni,” kilisema chanzo.