LOGA AMTIMUA KIPA KINDA MAZOEZINI

Kocha Mkuu wa Simba, Zdravko Logarusic, amemtimua kipa wa timu hiyo, Abuu Hashim, baada ya kukwaruzana naye kwenye mazoezi ya timu hiyo yaliyofanyika juzi kwenye Uwanja wa Kinesi uliopo Ubungo, Shekilango jijini Dar es Salaam.

Akizungumza kwenye mazoezi ya timu hiyo yaliyofanyika uwanjani hapo juzi (Jumatatu), kocha wa makipa wa timu hiyo, Iddi Pazi 'Father', alisema kipa wake huyo hayupo uwanjani baada ya kutimuliwa na kocha mkuu wa kikosi hicho (Loga).

“Leo ndiyo tumeanza mazoezi baada ya kumaliza mapumziko mafupi lakini kipa wangu, Abuu Hashim, ametimuliwa na kocha mkuu baada ya kuhitilafiana kwenye mazoezi yaliyofanyika siku ya mwisho.

Baada ya kutibuana naye, alimpiga marufuku kukanyaga mazoezini mpaka atakapomuita, sasa sijui atamuita lini,” alisema Father.

Kocha huyo wa makipa alisema chanzo kikubwa cha kutimuliwa kipa huyo ni kushindwa kufuata maagizo ya Loga kwenye mazoezi na alipomuuliza alimwambia hajisikii vizuri, anaumwa ndipo Loga akamuona kama muongo akaanza kumbwatukia na kumtimua.

Akizungumzia tukio hilo, Loga amesema ameamua kumpumzisha kipa huyo kwa muda mpaka atakapojisikia nafuu na kukataa kulizungumzia kiundani sakata hilo.