MAKALA: HOFU YANGU KWA BARUA ZA FIFA KWA RAGE

Na Saleh Ally

HATIMAYE Mwenyekiti wa Simba, Ismail Aden Rage, ametangaza rasmi kwamba hatagombea nafasi hiyo mara baada ya muda wake kwisha, haya si maneno yangu, amesema mbele ya wanachama wakati wa mkutano wa marekebisho ya katiba.

Huenda hili likawa wazo zuri na msaada mkubwa kwa Simba lakini kutakuwa na mambo mengi ya kujifunza kwa wanachama na njia walizopita hadi kufikia hapa walipo na uongozi wao utamaliza muda ukiwa umewaacha wapi katika kipindi hiki cha miezi miwili.

Nilisikia walitaka kumchapa Rage kwa kuwatolea maneno ya shombo lakini askari polisi waliokuwa eneo la mkutano wakamuokoa. Nimpe pole Rage, lakini bado nasisitiza, kiburi si maungwana. Bora kujali utu kuliko vitu.

Yote hayo ninaweza nikawa ninapita katika kupitia yale yaliyotokea katika mkutano huo wa marekebisho ya katiba uliofanyika Jumapili iliyopita kwenye Ukumbi wa Bwalo la Maofisa wa Polisi jijini Dar es Salaam. Lakini ninacholenga hasa ni kuhusu fedha za mshambuliaji Emmanuel Okwi.

Kawaida nimekuwa nikipata rundo la maoni kutoka kwa mashabiki wa soka kuhusiana na namna ambavyo Simba inaweza kupata malipo yake ili kuepuka hasara kubwa ya kumuuza Okwi bure kwa Etoile du Sahel.

Najua kabisa kwamba kila nikiligusa suala la Okwi, Rage amekuwa mkali sana na ndiyo kipindi pekee ambacho amekuwa akisema ninamsakama au kutoa vitisho vyake. Lakini kwa kuwa najua yote anayoyasema si sahihi na ninachohoji ni kingine, basi naendelea kuuliza na kuchambua tu.

Katika kauli alizowahi kuzitoa Rage, alisisitiza Etoile wangewalipa dola 300,000 (Sh milioni 480) hata kabla yeye hajaondoka madarakani, lakini juzi ametangaza kwa mara ya pili kuwa Shirikisho la Soka la Kimataifa (Fifa) limewahakikishia kuwa watalipwa fedha zao, hata kama yeye Rage hatakuwa madarakani.

Miezi miwili kabla, Rage alisema amepokea barua kutoka Fifa ikionyesha namna Etoile walivyoomba kusogezewa muda wa kulipa fedha hizo za Okwi. Hofu yangu iko hapo, kwamba pamoja na kauli hizo za Rage, hakuna hata mwanachama mmoja aliyehoji zilipo barua hizo.

Ilikuwa vizuri kuwaonyesha wanachama barua hizo ili kupata uthibitisho wa anachokisema, lakini Rage hakufanya hicho, kitu ambacho kinanipa hofu kwamba huenda mambo yako ndivyo sivyo, lakini anajaribu kuwapoza wanachama hao kwa mgongo wa chupa.

Kama alivyosema Rage kwamba hana njaa, kweli hilo linawezekana kabisa. Lakini kwenye suala la fedha hakuna anayeridhika, ndiyo maana hadi leo bilionea Mtanzania, Bakhresa anaendelea kufanya biashara. Hiyo maana yake anasaka noti, sasa itakuwa kwa Rage?

Kauli mbili alizowahi kuzisema Rage ambazo zinathibitisha kwamba hata alichokisema kuhusiana na hizo barua kinaweza kisiwe kweli ni hizi; moja, fedha zitalipwa kabla ya mwaka jana kwisha, pili, kamwe Okwi hatacheza Yanga.

Hadi mwaka umeisha, hakukuwa na fedha zilizolipwa hata senti, ndiyo maana nimekuwa nikisisitiza hili kuwa Okwi aliuzwa bure kwa Etoile du Sahel. Pili hilo la kusema kamwe hatacheza Yanga, sasa Okwi anacheza tena michuano ya nyumbani na kimataifa!

Tangu Okwi aanze kucheza tena kwa ufafanuzi wa Fifa, Rage hakuwahi kuzungumza lolote na ajabu hakuna wanachama wa Simba waliohoji. Kama ambavyo nimekuwa nikisisitiza, Simba hawana sababu ya kuzungumzia suala la Okwi kucheza Yanga au la, badala yake waulizie fedha zao. Lakini mwenyekiti wao aliendelea kupambana na hilo.

Baadaye ilionekana kweli hakuwa sahihi, badala yake alitakiwa kuelekeza nguvu kwenye malipo ya Sh milioni 480. Sasa hilo limefanyika, lakini hadi leo hakuna lolote na hadithi ndiyo zinaonekana kuzidi kukolea, kama ingekuwa ni filamu, basi labda wakati huu ndiyo jambazi limekutana uso kwa uso na stelingi, tena kwa mara ya kwanza.

Filamu ya Okwi inakwenda ukingoni, lakini hadi leo Simba haijalipwa na matumaini ya kulipwa yako chini sana. Kuna kila sababu ya kusema hivyo kwa kuwa sababu za msingi ziko lukuki, nitakupa chache.

Etoile inayotakiwa kulipa fedha hizo kibao, haina faida yoyote na Okwi na Fifa hiyohiyo ndiyo ilimuidhinisha kwenda SC Villa na baadaye ikakubali acheze Yanga kwa mujibu wa TFF. Sasa jiulize, itakuwa vipi kulipa kitu ambacho hakina faida kwao?

Dola 300,000 si fedha kidogo. Timu kama Etoile inaweza vipi kufanya mchezo wa kijinga kama huo? Usisahau Waarabu hao wana uzoefu mkubwa katika masuala ya kuuza na kununua wachezaji, hivyo wanajua wafanye nini.

Lakini jiulize, kama Rage akiwa madarakani, alishindwa kurekebisha kosa lake la kumuuza bure Okwi, je, akiwa nje ya uongozi, ataweza vipi kuifanya kazi hiyo kwa ufasaha ili Simba ilipwe? Au siku ya mwisho atawahoji viongozi walio madarakani kushindwa kulishughulikia suala hilo ili waweze kulipwa!