MAKALA: PRESHA IMEHAMIA KWA MESSI

Na Saleh Ally

UTAONA katika mechi ya jana dhidi ya Osasuna namna Lionel Messi alivyokuwa akicheza kwa juhudi. Lazima afanye hivyo kurudi kwenye chati.

Katika mechi hiyo ya La Liga, Barcelona ilishinda kwa mabao 7-0, Messi akapiga hat trick lakini pia akatoa pasi za mabao.

Kukaa nje kumemuathiri, lakini ni wakati mwafaka kwake kuonyesha ni muhimu kama awali au zaidi. Tegemeo na mwenye msaada mkubwa. Unajua kwa sababu zipi?

RONALDO

Mkataba mpya wa Real Madrid na Cristiano Ronaldo ambao unailazimu klabu hiyo kulipa euro milioni 18 (Sh bilioni 39) kwa mwaka, unaonyesha umesababisha mpasuko wa chinichini kati ya Barcelona na Messi.

Mkataba huo mpya kati ya Ronaldo na Real Madrid walioingia miezi michache iliyopita, unaifanya klabu hiyo tajiri kuwa inamiliki wachezaji wawili maarufu wanaohusiana na suala la fedha nyingi.

Ronaldo ndiye mchezaji anayelipwa zaidi kuliko wengine wote duniani, lakini Gareth Bale ambaye amenunuliwa na Madrid akitokea Tottenham kwa pauni milioni 80 (Sh bilioni 208), ndiye mchezaji ghali zaidi kwa maana ya uhamisho.

Kutokana na hali hiyo, lazima Messi atahoji, ingawa amekuwa kwa kipindi kirefu, tayari kuna taarifa ya kuanza mjadala wa mkataba mpya.

Bado Barcelona na Messi hawajakubaliana katika mambo kadhaa ingawa Messi ameshindwa kudai fedha nyingi kama za Ronaldo kwa kuwa anataka apate euro milioni 9 (Sh bilioni 20) kwa mwaka ambazo ni nusu ya zile anazolipwa Ronaldo.

Messi ameonekana hana wasi katika hilo kwa sababu kadhaa, moja ni kuhusiana na fedha anazopata kutoka kwa wadhamini wake pembeni na Barcleona.

Kwa mwaka, Messi anaingiza hadi euro milioni 23 (Sh bilioni 52) kutoka kwa wadhamini wake nane na wadhamini wakuu wamekuwa ni Adidas ambao katika kila miezi 12, wao hutoa euro milioni 8 (Sh bilioni 18).

Messi amekuwa akionekana ni kama mtoto wa Adidas, juhudi za Nike kumsaka zimekuwa zikigonga mwamba kwa kuwa yeye ameonyesha mapenzi makubwa na Adidas na suala hilo linatokana na historia kati yake na makampuni hayo mawili makubwa ya vifaa vya michezo.

Messi aliwahi kuomba apate udhamini wa Nike wakati akiwa bado hajajulikana sana, Nike wakakataa kwa kuona hakuwa na hadhi yao. Lakini Adidas walijitokeza na kumchukua, ndiyo maana anazidi kuwaonyesha fadhila.

Tukirudi kwenye mkataba mpya na Barcelona, euro milioni 9 kwa mwaka kwake ni sawa, lakini Barcelona nao wanasema wanahitaji kumiliki haki ya picha za Messi, kitu ambacho yeye na msimamizi wa masuala yake ya kimaslahi, Jorge Messi ambaye ni baba yake mzazi wanapinga.

Messi na Jorge, wanachotaka pamoja na kutolewa euro milioni 9 kwa mwaka, basi kitu muhimu kwao ni kuachiwa haki za picha hizo ambazo pia zina nafasi ya kuwaingizia mamilioni ya fedha.

Barca inahitajika kukusanya euro milioni 45 (Sh bilioni 101) ili kuanzisha mkataba mpya wa miaka mitano na Messi. Ingawa tayari ina mkataba naye hadi mwaka 2018, maana yake kama wataingia huo mpya itakuwa ndiyo uthibitisho wa Messi kuzeekea Barca.

Inaonekana wazi kuwa Barcelona haikuwa tayari kutengeneza mkataba mpya na Messi lakini hali ilivyo na presha kutoka Madrid namna inavyowahudumia Bale na Ronaldo, Barcelona wanaingia kwenye presha.

Ronaldo ndiye amekuwa presha kubwa kwa Messi, lakini presha zaidi kwa Barcelona. Ingawa wamekuwa wanakataa lakini kuanza kujadili mkataba mpya wa Messi katika kipindi hiki kunadhihirisha hilo.

Messi bado hajawa katika kiwango kizuri, anajaribu kuinuka lakini hakuna ubishi kuwa atakaa sawa na kuanza kufanya vizuri kama hataumia na kukaa nje kwa muda mrefu kwa kuwa ana uwezo mkubwa.

Ushindi wa Ronaldo kuwa mchezaji bora pia ni sehemu ya presha nyingine kwa Messi ambaye anatambua analazimika kufanya vizuri ili kushindana naye katika tuzo zijazo.

Awali ilionekana kuwa Messi alikuwa presha kubwa kwa Ronaldo, hiyo ilikuwa ni hali halisi. Ilionekana kama alikosea kuhamia nchini Hispania, wengine wakashauri angeweza kubaki England na kuichezea Manchester United na ingekuwa rahisi kwake kupambana na Muargentina huyo.

Wakati Ronaldo anatua Real Madrid akitokea Manchester, tayari Messi alikuwa ni mfalme wa soka la Hispania na duniani kote, hivyo ikaonekana kama vile Ronaldo alikosea.

Utaona mara ya mwisho Ronaldo alichukua uchezaji bora wa dunia mwaka 2008, baada ya hapo hakuwahi kupata nafasi hiyo huku Messi akishinda zaidi ya mara mbili.

Hali hiyo ilisababisha presha kubwa kwa Ronaldo ambaye bado aliendelea kupambana ikiwa ni pamoja na kuweka rekodi ya kufunga mabao mbele ya Messi.

Wachambuzi wa soka walisema Ronaldo kwenda kwenye anga za Messi ni sawa na suala la kujipeleka kwenye mdomo wa mamba. Lakini sasa inaonekana amefanikiwa kumthibiti mamba!