KISA RAFU KUPINDUKIA, MBEYA CITY YAANDIKA BARUA TFF KULALAMIKA

KIKOSI CHA MBEYA CITY

Uongozi wa Mbeya City ya jijini Mbeya, unatarajia kuwasilisha barua ya malalamiko dhidi ya Rhino Rangers kwa Shirikisho la Soka Tanzania (TFF).

Mbeya City haikufurahishwa na mchezo wa kibabe uliochezwa na Rhino katika mchezo wa Ligi Kuu Bara baina ya timu hizo Machi 8, mwaka huu, ingawa ilipata ushindi wa mabao 3-1 kwenye Uwanja wa Sokoine, Mbeya.

Timu hiyo inayokamata nafasi ya tatu kwenye ligi hiyo, inalalamika Rhino waliambiwa na viongozi wao wacheze mchezo mchafu, hali iliyosababisha kipa wao amvunje mbavu kiungo wao mshambuliaji, Richard Peter.

Katibu Mkuu wa Mbeya City, Emmanuel Kimbe, amesema wameamua kuiandikia barua TFF kulalamikia mchezo huo, pia wakimlalamikia mwamuzi kwamba hakuchezesha katika kiwango kinachotakiwa.

“Tunatarajia kuandika barua kupeleka TFF kumlalamikia msimamizi wa mechi pamoja na mwamuzi na kipa kwa jambo walilolifanya, kwani licha ya tukio hilo kutokea lakini hakutoa adhabu yoyote kwa kipa.

“Alianza kwa kumrukia Mwegane Yeya lakini mwamuzi hakufanya kitu na baadaye akamrukia Peter na kumsababishia matatizo kwa kumvunja mbavu, kwa jumla maamuzi ya mzunguko wa pili yanaonekana siyo sahihi kwani yamelenga kutuharibia zaidi,” alisema Kimbe.