LOGARUSIC AANIKA UGUMU MWINGINE UNAOMBANA ANAPOKUWA SIMBA

Kocha Mkuu wa Simba, Mcroatia, Zdravko Logarusic, amelitaja suala la kutokuwa na uamuzi wa haraka ni moja ya tatizo kubwa kwa wachezaji wake.

 

Mcrotia huyo ambaye ameanza kuinoa timu hiyo katika mzunguko wa pili wa Ligi Kuu Bara na  timu imekuwa haina matokeo mazuri.

Awali, wachezaji wake walidai kwamba tatizo kubwa ni ukali wake, lakini mwenyewe ameamua kuwarudishia lawama kwa kusema wana akili nzito katika kufanya maamuzi.

Loga alisema kikosi hicho kina wachezaji wengi wazuri lakini bado wengi wao hawatambui kitu gani wanatakiwa kufanya ili waweze kuisaidia timu yao kufanya vyema, hasa katika upigaji wao pasi ambao bado si mzuri.

“Wachezaji wangu ni wazuri na wanaweza kubadilika na kuwa na ‘performance’ nzuri lakini tatizo lao bado hawana ule uamuzi wa haraka katika kufanya mashambulizi, pale mchezaji anapopata mpira.

“Na hata upigaji wao wa pasi bado siyo mzuri, wanapiga pasi fupi, wanatakiwa wafahamu kusoma hata mawazo za wapinzani siyo unapiga tu ilimradi. Lazima uwe umelenga kuwa kitu fulani chaweza kutokea na wajielewe nini wanatakiwa kufanya wawapo uwanjani,” alisema Logarusic.