LOGARUSIC AANZA KUMCHUNGULIA KAPOMBE KWENYE YOUTUBE

KAPOMBE WAKATI AKIWA CANNES

KochaMkuu wa Simba, Mcroatia Zdravko Logarusic, ameamua kutenga muda wake na kuingia kwenye mtandano wa YouTube, maalum kwa ajili ya kumfuatilia Shomari Kapombe ambaye anatajwa kuwa mbioni kurejea kikosini hapo.

Loga ameshapewa taarifa juu ya Kapombe ambaye bado ana mkataba na Klabu ya AS Cannes ya Ufaransa, kuwa anaweza kujiunga na timu hiyo baada ya kutokuwa na maelewano mzuri na klabu hiyo ya Ufaransa.

 

LOGA AKIONYESHA UJUZI

Loga amezungumza na SALEHJEMBE na kusema kuwa amefanya hivyo kwa kuwa alihitaji kumfahamu mchezaji huyo, ili kuhakikisha anajua jinsi ya kumtumia pindi atakapotua klabuni hapo.

“Niliomba jina lake ili nikamuangalie YouTube kwanza, nimemuona kwamba ni mzuri lakini mpira upo tofauti na vitu vingine, huwezi jua kwa sasa ana kiwango cha namna gani kwa muda wote aliokuwa nje.

“Mpira ni mchezo wa kuonekana unapokuwa uwanjani, nitajihakikishia zaidi pale atakapotua kweli na kuanza mazoezi pamoja na wenzake ndiyo nitagundua kuwa ana kiwango gani na nimtumie vipi kwenye kikosi changu,” alisema Loga.

Kapombe aliondoka nchini na kujiunga na AS Cannes wakati huo Simba ikiwa chini ya Mfaransa, Patrick Liewig.

Hivyo hakupata nafasi ya kumuona akiitumikia Simba, tayari viongozi wa Simba wameanza juhudi za kutaka kumrejesha baada ya kufanya mazungumzo ya awali na AS Cannes.

Lakini Azam FC na Yanga wamekuwa wakimuwania na kuna taarifa wamekuwa wakifanya naye mazungumzo na AS Cannes ilishaonya.

Pia kuna taarifa, Azam FC imekuwa ikimshawishi kuvunja mkataba ili impate kwa ulaini.