Wakati kikosi cha Simba kikiwa kwenye
harakati zake za kuhakikisha kinafanya vizuri katika mechi zake za ligi kuu
zilizobakia, beki wa kati wa timu hiyo raia wa Kenya, Donald Musoti, amewataka
wachezaji wenzake kudumisha umoja na
upendo ili waweze kutimiza lengo hilo.
Hata hivyo, amewataka kuachana na tabia
ya kujigawa katika makundi ambayo yanaweza kusababisha mpasuko ndani ya timu
hiyo kwa hivi sasa na badala yake wawe kitu kimoja kwa kila jambo linalohusu
timu.
Musoti alisema hali ya umoja na upendo
iliyopo kwa sasa katika kikosi hicho ni ya kawaida na inatakiwa kudumishwa
zaidi kwa wakati huu ambao timu hiyo ipo kwenye vita kali ya kutafuta nafasi ya
pili.
Alisema tangu afike katika kikosi hicho,
amekuwa akifurahia maisha lakini jambo linalomsikitisha ni kutokuwepo kwa
upendo wa dhati kati ya wachezaji pamoja na benchi lao la ufundi, hali ambayo anaomba ifanyiwe kazi.
“Viongozi nao wanatakiwa kuwa kitu
kimoja kwa sasa na kusahau tofauti zao ambazo walikuwanazo huko nyuma, hivi sasa
tunahitaji kuhakikisha tunamaliza ligi kuu tukiwa katika nafasi nzuri itakayotuwezesha
mwakani kushiriki kwenye mashindano ya kimataifa.
“Hata hivyo, lengo hilo litatimia pale
watu wote wa Simba tutakapokuwa kitu kimoja, kwani nafasi bado tunayo,” alisema
Musoti.
Kabla ya mchezo wa jana Jumapili dhidi
ya Coastal Union, Simba ilikuwa katika nafasi ya nne kwenye msimamo wa ligi
ikiwa na pointi 36 ambazo ni sita nyuma ya Mbeya City iliyo katika nafasi ya
tatu.
0 COMMENTS:
Post a Comment