MAKALA: BAYERN VS MAN UNITED, ILIKUWA NI FIAT DHIDI YA MLIMA KITONGA

Na Saleh Ally

MECHI mbili za robo fainali ya Ligi ya Mabingwa Ulaya kati ya mabingwa watetezi Bayern Munich dhidi ya mabingwa wa England, Manchester United, zilitarajiwa kuzaa mambo mengi sana.

Kazi rahisi kuliko wakati wote hata kama mpira unadunda kwa wachambuzi wa soka zilikuwa ni kuhusiana na Bayern Munich kuitoa Manchester United kwa urahisi.

Mechi ya kwanza ilipangwa kupigwa Old Trafford, ikaonekana ni kazi rahisi kwa Bayern na kilichokosewa ni kitu kidogo tu. Wengi waliamini Wajerumani hao wangeshinda hata wakiwa ugenini jijini Manchester, mechi ikaisha kwa sare ya bao 1-1.

Baada ya hapo, kiasi fulani kukawa na mabadiliko ya hisia, kwamba inawezekana Man United wakapindukia kabati na kuwavua ubingwa mabingwa hao, kitu ambacho kilikuwa ni sawa na ndoto za alinacha.

Kwani katika mchezo wa pili uliopigwa nchini Ujerumani, juzi usiku, United walikiona cha moto kwa kulambwa mabao 3-1 na kuondolewa rasmi kwenye michuano hiyo mikubwa Ulaya.

Ukiangalia takwimu kwa maana ya mwenendo wa timu hizo, lilikuwa ni jambo la kubahatisha kupita kiasi kuamini Man United ingewang’oa Bayern.

Kikosi hicho cha David Moyes, kilisafiri kwenda Munich kikiwa na gumzo la tegemeo la mchezaji mmoja tu, Wayne Rooney.

Lakini kama ukizungumzia Bayern, utataja zaidi ya wachezaji sita ambao ni hatari na wana uwezo wa kutengeneza matokeo kwa uwezo binafsi, angalia; Arjen Robben, Frank Ribery, Thomas Muller, Mario Gotze, Mario Mandzukic, Thiago Alcantara na wengine.

Sasa piga hesabu kwa Man United ambayo ina sura ya mtu mmoja, isiyo na kiungo nyota mchezeshaji au mkabaji. Wala winga hatari au mshambuliaji msaidizi kwa Rooney hasa inapotokea Robin van Persie, yuko nje.

Man United kushinda kwa Bayern, ilikuwa ni sawa na gari kubwa la mizigo aina ya Fiat kutaka kulazimisha kuupanda Mlima Kitonga kwa kasi ya kilomita 60 kwa saa. Inajulikana gari aina hiyo likipanda basi spidi 10 ndiyo saizi yake!

Ukizungumzia kwa maana ya ukubwa wa majina ya timu, hazipishani kwa kuwa rekodi zake zinaingia kwenye historia ndefu ya mafanikio. Lakini hali halisi na kipindi husika, Bayern dhidi ya Man United ilikuwa ni vita ya Daudi na Goliath.

Lakini kuna mambo mengine ya kiufundi yaliyokuwa yanaonyesha Man United kuvuka dhidi ya Bayern ni kwa asilimia 15 tu. Angalia maboksi haya ya asilimia.

Bayern:

Msimu huu katika ligi; Bayern Munich imeshinda 86% ya mechi zake, imeshinda 93% ya mechi za nyumbani, imeshinda 80% ya mechi za ugenini.

Bayern Munich imefunga mabao kwa 100% ikiwa nyumbani, imefunga mabao ugenini kwa 93%, Bayern kwa 76% imekuwa ya kwanza kufunga mabao katika mechi zake na kwa 59% imeongoza hadi mapumziko.

Bayern imefunga bao katika kila mechi kati ya 14 zilizopita, isipokuwa moja ambayo ilikuwa ya kwanza kwao kupoteza kabla ya kuivaa Man United.

Man Utd:

Msimu huu katika ligi; Man Utd imefunga angalau bao moja kwa 88%  katika mechi zake za nyumbani na imefunga bao moja angalau kwa 61% kwa mechi zake za ugenini.

Man United imeshinda mechi za 4 zilizopita za ugenini pia haijafungwa katika katika ligi, Man Utd haijafungwa hata bao moja katika mechi zake 5 za ugenini ambayo ni 100% ya kutopoteza nje, zilizopita za ugenini pia.

Bayern:

DATA ZA LIGI

MSIMAMO:

Tayari Mabingwa

MECHI 4 ZILIZOPITA:

FC Augsburg     1-0 Bayern

Bayern                3-3 Hoffenheim

Hertha Berlin   1-3 Bayern

FSV Mainz                  0-2 Bayern

Man United:

DATA ZA LIGI:

MSIMAMO:

Nafasi ya 7

MECHI 4 ZILIZOPITA:

Newcastle                  0-4   Man Utd                      

Man Utd            4-1   Aston Villa                            

 Man Utd                    0-3   Man City                      

West Ham                   0-2   Man Utd