MAKALA: HAIWEZEKANI, CHONDE MAN UNITED, RIO BYE BYE KWA TWITTER

Na Saleh Ally

MWISHO wa Rio Ferdinand katika kikosi cha Manchester United, haujaenda kama ambavyo wengi walitarajia.

Rio hataonekana tena kwenye kikosi cha United na msimu huu mbaya kwa kikosi hicho, umekuwa wa mwisho kwake.

Kizazi kingine cha Alex Ferguson kinaondoka kwenye kikosi hicho lakini uondokaji wake unaonekana si mzuri kwa kuwa wengi walitarajia kuwa Rio alipaswa kuagwa kwa mashamsham ikiwezekana ndani ya Uwanja wa Old Trafford, lakini haikuwa hivyo.

Shukrani za Manchester United kwa Rio zimepitia kwenye mtandao wa kijamii wa Twitter kwenye akaunti ya klabu hiyo.

Maneno haya yameandikwa: “"#mufc inapenda kumshukuru Rio Ferdinand kwa uhudumu wake wa muda mrefu na wenye mafanikio na tunamtakia mafanikio zaidi katika maisha yake baadaye.”

Maneno hayo ni ya kiungwana, lakini kwa kuchimba zaidi yanaonyesha mpira hauna shukrani, hauna adabu na si Tanzania pekee, bali England na duniani kote.

Miaka 12 ikiwemo 11 ya mafanikio katika klabu hiyo tokea alipojiunga nayo akitokea Leeds kwa kitita cha pauni milioni 30 (zaidi ya Sh bilioni 78) na kuweka rekodi ya kuwa beki na mchezaji ghali zaidi katika kipindi hicho siyo michache.

Katika kitabu cha mwisho kuhusu maisha yake, Ferguson amebainisha kuwa Manchester United imekuwa ikifanya vizuri zaidi kila inapokuwa na mabeki wa kati wa uhakika akawatolea mfano Garry Pallister na Steve Bruce na baadaye kipindi cha akina Rio na mwenzake Nemanja Vidic.

Mapenzi makubwa ya Rio kwa timu hiyo yako wazi, alipambana kwa kila namna hadi ilipofikia “akili inataka, mwili hauna uwezo.”

Ndiyo maana akaomba kubaki Old Trafford kwa msimu mmoja zaidi, lakini imeshindikana, klabu imemueleza katika hatua za mwisho kwamba haitaweza kuendelea naye huku yeye akiwa na uhakika angepata nafasi.

Kutokana na hali hiyo, inaonekana Rio hakutegemea, hali hiyo ikamchanganya na haraka akaandika kwenye mtandao wake hivi: “Nimekuwa na wakati mgumu wa kutafakari wakati wa miezi michache iliyopita kuhusiana na miaka 12 katika klabu hii bora duniani, lakini mwisho nimeamua kuondoka.

“Nilijiunga na Manchester United kwa matumaini ya kushinda vikombe, najisikia furaha nimekuwa na mafanikio makubwa, kuna mengi ya kukumbuka, mfano tulivyotwaa ubingwa wa Ulaya kule Moscow.

“Inawezekana sikupata nafasi ya kuwaaga mashabiki kama ambavyo nilitaka, lakini sasa najisikia niko vizuri zaidi na tayari kwa lolote kutokana na maisha yatakavyokuwa.”

Maneno ya Rio yana maana kubwa, anaonyesha kiasi gani ambavyo hakupewa nafasi ya kuwaaga mashabiki, lakini anasisitiza yuko fiti, maana yake klabu ndiyo haikutaka aendelee.

Kutoendelea linaweza kuwa jambo la msingi kwa kuwa miaka 35 huenda inatosha hasa kwa beki na timu kama Man United ikizingatiwa alikuwa majeruhi mfululizo. Lakini aina yake ya kuondoka, si sahihi.

Tayari Man United imeanza juhudi za kumnasa beki ngangari mwenye miaka 18 tu, huyu ni Luke Shaw ambaye wametaka kutoa pauni milioni 27 lakini Southampton wamesema wanataka 30.

Rio anaondoka United akiwa beki aliyecheza kwa mafanikio makubwa zaidi katika kipindi cha Ferguson huku misimu miwili akichukua namba moja kwa mchezaji aliyepiga pasi nyingi kwa msimu baada ya Fergie kuanzisha mfumo wa timu kuchezeshwa na mabeki wa kati.

Hadi msimu uliopita unaisha, Rio alicheza mechi 14 tu kwa United lakini ndiye beki mwenye uwezo mkubwa zaidi wa kupiga pasi zinazofika kuliko mwingine. Ubora wa pasi zake ni asilimia 89 ambao ni wa juu kuliko hata viungo wengi nyota katika ligi hiyo.

Tottenham imeandaa mechi maalum ya kumuaga beki wake wa kati Ledley King ambaye ameichezea mechi 268 katika kipindi cha miaka 13, wakati katika miaka 12, Rio ameitumikia United katika mechi 312. Hii inaonyesha, anastahili kuagwa kwa heshima, apewe heshima yake.

Mwache Rio aende zake, lakini anaondoka bila ya kupata heshima yake. Funzo kwa wengine England, lakini hata hapa nyumbani Tanzania. Rio ni jembe kweli.

TAKWIMU:

MISIMU        MIAKA    MECHI      MABAO  

2002-2014         12              312                7