WENGER AZISAHAU SIKU 3,283, ASEMA ANABAKI ARSENAL

Kocha Mkuu wa Arsenal, Arsene Wenger amesisitiza anataka kubaki katika kikosi hicho alichoanza kukinoa mwaka 1996.

Wenger aliingoza Arsenal kwa muda wa siku 3,283 bila ya kubeba kombe, hali iliyosababisha mzozo mkubwa na masimango kwake.

Lakini mwisho, amekata mzizi wa fitna kwa bao la Ramsey ambalo lilikuwa la tatu na kuiwezesha Arsenal kushinda kwa 3-2 dhidi ya Hull City na kubeba Kombe la FA.

Wenger amesema: “Siku zote nimekuwa nikisisitiza, kombe haliwezi kuwa kipimo kwangu kama naondoka au nabaki.

“Lakini nimekuwa nasisitiza kuwa nataka kubaki Arsenal, hili si jambo geni hata kidogo.

“Kikubwa leo ni kuwapongeza wachezaji walivyopambana kutoka chini kwa mabao mawili hadi kuibuka na ushindi.

“Kikubwa kwetu kilikuwa ni ubingwa, ilikuwa ni lazima kushinda na tumefanya hivyo,” alisema Wenger.

Mara ya mwisho Arsenal ilitwaa Kombe la FA mwaka 2005 na ndilo kombe lao la mwisho kabla ya jana usiku kuishinda Hull na kubeba hilo ambalo linakuwa la tano kwa makombe ya FA aliyobeba.