ANGALIA KOCHA SIMBA ALIVYOMGAWIA MCHUNGAJI YANGA JEZI YA SIMBA

LOGA AKIWA NA MCHUNGAJI MOSHA

Kocha wa Simba, Zdravko Logarusic ametoa zawadi ya jezi ya Simba kwa mchungaji wa kanisa la Katoliki ambaye ni mshabiki wa Yanga na akaipokea bila ya matatizo.

Logarusic maarufu kama Loga amewasilisha zawadi hiyo siku tatu katika mji aliozaliwa wa Slavonski Brod ambao mchungaji, Josephat Mosha amekuwa akifanya kazi kwa miaka nane sasa.

Mosha raia wa Tanzania ambaye anatokea mkoani Arusha amekuwa akifanya kazi nchini humo kwa miaka nane na alikutana na Loga baada ya kusikia amekuwa akifanya kazi nchini.

“Kweli, mchungaji ni mtu mwema sana, alinitafuta kwa juhudi akitaka tukutane, mwisho ikawa hivyo na tulikula chakula cha usiku pamoja kwa mwaliko wake,” alisema Loga.

“Baada ya hapo sikuwa na zawadi ya kumpa zaidi ya jezi ya Simba, ingawa aliniambia ni shabiki wa Yanga, lakini aliipokea kuonyesha utaifa. Watanzania ni watu waungwana sana na mchungaji Josephat ni sehemu ya mfano.”

Mchungaji Mosha ameishi nchini humo kwa miaka nane, hata hivyo sasa amehamia katika eneo tofauti na mji wa Slavonski Brod aliozaliwa Loga.

Sasa anaishi na kufanya kazi katika mji wa Sibenik ambao uko kilomita 400 kutoka Slavonski Brod ambako ameishi kwa miaka saba.

Loga yuko kwao Croatia kwa ajili ya mapumziko na amekuwa akisubiri uchaguzi mkuu wa Simba ili arejee kazini.

Kocha huyo aliichukua Simba chini ya Abdallah Kibadeni, lakini ikamaliza ligi ikiwa nafasi ya nne na ameahidi iwapo ataanza nayo msimu, basi ana uhakika itakuwa bingwa.