KAMATI YA RUFAA TFF, YAIITA KAMATI YA UCHAGUZI SIMBA SIKU YA KUMCHAMBUA WAMBURA

Kamati ya rufaa ya TFF itakayosikiliza rufaa ya mgombea wa urais Simba, Michael Wambura aliyeenguliwa kwenye uchaguzi, imewaalika wajumbe wa kamati ya uchaguzi ya Simba.

Wajumbe wa kamati ya uchaguzi na Mwenyekiti wao Damas Daniel Ndumbaro ‘DDN’, wameombwa kufika kwenye kikao hicho cha kesho mchana.

Kesho ndiyo siku ambayo kamati hiyo itakuwa inapitia rufaa ya Wambura anayepinga kuondolewa kwenye kinyang'anyiro cha uchaguzi baada ya kuondolewa kwa mara ya pili baada ya kubainika alifanya kampeni kabla ya muda wake.

Awali kamati hiyo ilikata rufaa iliyokuwa isikilizwe na kamati ya maadili ya TFF, lakini Rais wa shirikisho hilo, Jamal Malinzi akaibuka na kutaka iundwe kamati ya maadili ya Simba, kitu ambacho kimeonekana ni kuvuruga uchaguzi na tayari wanachama wa Simba wamelipinga hilo.

Safari hii, kamati ya rufaa ya TFF imekubali kuwaita wajumbe wote wa kamati ya uchaguzi ambao wamemuengua Wambura kwa mara ya pili baada ya kubainika alifanya kampeni kabla ya muda wake.

Kabla ya hapo kamati hiyo ilimuonyesha Wambura na mgombea mwenzake, Evans Aveva kutoshiriki matendo ya kampeni kabla ya kipindi sahihi, lakini Wambura akafanya hivyo baada ya kuenguliwa mara ya kwanza na pale aliporudishwa na kamati ya rufaa.

Wambura amekata rufaa juzi na kamati hiyo inakutana kuisikiliza rufaa yake kesho, ndani ya siku tatu kila kitu kimekwenda kama kilivyopangwa.

Kamati hiyo ya rufaa ya TFF, itasikiliza rufaa hiyo kesho na taarifa zinaeleza uamuzi utatolewa keshokutwa Ijumaa.