KIUNGO WA ZAMANI SIMBA AMTAKA WAMBURA AKAE KANDO, AACHANE NA SIMBA

Kiungo wa zamani wa Simba, Hamis Soda amemtaka mgombea aliyeenguliwa kwenye kinyang’anyiro cha kugombea nafasi ya urais katika klabu hiyo, Michael Wambura kukaa pembeni na kuwaachia wengine.

Wambura kwa sasa anasubiri hatma yake ya kugombea nafasi hiyo baada ya kukata rufaa kwenye Kamati ya Uchaguzi ya TFF huku hukumu yake ikiwa ni Juni 9, mwaka huu.

Soda amesema kuwa kutokana na Wambura kuenguliwa kwenye nafasi hiyo, basi hana budi kukaa pembeni na kuwaachia wengine ili kulinda heshima yake.

“Wambura anachotakiwa kwa sasa ni kuachana na uongozi kwa sababu siyo mara ya kwanza kuwekewa mapingamizi na kama ningekutana naye, ningemshauri apumzike mpaka miaka minne ipite,” alisema Soda ambaye aliichezea Simba mwaka 1974 mpaka 1985.